அரசியல் செம்மையாக இருந்தால் அது தமிழர் பொங்கல்; அரசியல் சீர்குலைந்தால் அது திமுக பொங்கல் – அண்ணாமலை விமர்சனம்
அரசியல் ஒழுங்காக செயல்பட்டால் அது தமிழர்களின் பொங்கலாக இருக்கும்; அரசியல் தவறான பாதையில் சென்றால் அது திமுகவின் பொங்கலாக மாறிவிடுகிறது என பாஜக முன்னாள் மாநில தலைவர் அண்ணாமலை கடுமையாக விமர்சித்துள்ளார்.
தென்காசி மாவட்டம் சங்கரன்கோவில் அருகே உள்ள வாசுதேவநல்லூரில், தென்காசி மாவட்ட பாஜக தலைவர் ஆனந்தன் அய்யாசாமி ஏற்பாட்டில் 1008 பானைகளில் பொங்கல் சமைக்கும் பாரம்பரிய விழா நடைபெற்றது. இவ்விழாவில் சிறப்பு விருந்தினராக அண்ணாமலை கலந்து கொண்டார்.
அண்ணாமலை நிகழ்விடத்திற்கு வருகை தந்தபோது, பாஜக நிர்வாகிகள், தொண்டர்கள், பெண்கள் உள்ளிட்ட ஏராளமானோர் உற்சாக வரவேற்பு அளித்தனர். வழியெங்கும் தப்பாட்டம், நையாண்டி மேளம், ஒயிலாட்டம், பொய்க்கால் குதிரை ஆட்டம் போன்ற தமிழர் பாரம்பரிய கலைநிகழ்ச்சிகள் இடம்பெற்றன. பொதுமக்கள் பலர் அண்ணாமலையுடன் செல்ஃபி எடுத்துக் கொண்டனர்.
விழாவின் ஒரு பகுதியாக, கண்களில் துணி கட்டிக் கொண்டு உரியடி அடித்து உடைத்து அண்ணாமலை கலைநிகழ்ச்சியில் பங்கேற்றார். இதனை கண்ட தொண்டர்கள் ஆரவாரத்துடன் மகிழ்ச்சி வெளிப்படுத்தினர்.
பின்னர் உரையாற்றிய அண்ணாமலை, தென்காசி மாவட்டத்தில் காலடி வைத்தவுடன் தன் சொந்த ஊரில் இருப்பதைப் போல உணர்வதாக கூறினார். இந்த மண் சாதாரணமானது அல்ல என்றும், வெண்ணிக்காலாடி ஒண்டிவீரன், பூலித்தேவன் போன்ற மாவீரர்கள் வாழ்ந்து மறைந்த பெருமைமிக்க பூமி என்றும் தெரிவித்தார். ஒரே சட்டமன்ற தொகுதியில் மூன்று வீரர்களை கொண்ட பெருமை வாசுதேவநல்லூர் தொகுதிக்கே உரியது எனக் குறிப்பிட்டார்.
இந்த தைப்பொங்கல் நாளில் தாம் கூறும் உறுதியான கருத்து என்னவென்றால், தென்காசி மாவட்டத்தில் நல்ல மனிதர்களை ஆட்சி பொறுப்பில் அமர்த்த வேண்டும் என்றும், சட்டமன்றம் மற்றும் பாராளுமன்றத்திற்கு மண்ணையும் மக்களையும் அறிந்தவர்களைத் தேர்வு செய்ய வேண்டும் என்றும் வலியுறுத்தினார். தேசிய சிந்தனை கொண்டவர்களுக்கும், விவசாயம் மற்றும் நிலத்தை நேசிப்பவர்களுக்கும் மக்கள் வாய்ப்பு வழங்க வேண்டும் என்றார். புளியங்குடி எலுமிச்சைக்கு பெயர் பெற்றது என்றும், அந்த எலுமிச்சை செடிகளை தமது தோட்டத்திலும் நட்டுள்ளதாகவும் தெரிவித்தார்.
வாசுதேவநல்லூர் பகுதியில் ஒருகாலத்தில் சுமார் ஒரு லட்சம் ஏக்கர் விவசாய நிலங்கள் இருந்ததாகவும், தற்போது அவை பெரிதும் குறைந்துள்ளதாகவும் கூறினார். இதற்கு செண்பகவல்லி அணை உடைந்ததே காரணம் என்றும், அதனை சரிசெய்ய தற்போதைய தமிழக அரசு நடவடிக்கை எடுக்கவில்லை என்றும் குற்றம்சாட்டினார். முன்னாள் முதலமைச்சர்களான காமராஜர் மற்றும் எம்ஜிஆர் காலங்களில், அணை சேதமடைந்தபோதெல்லாம் உடனடியாக பழுது நீக்கப்பட்டதாக நினைவூட்டினார்.
திமுக தேர்தல் அறிக்கையின் 84வது வாக்குறுதியில் செண்பகவல்லி அணை சீரமைக்கப்படும் என கூறப்பட்ட நிலையில், அதற்கு எந்த முன்னேற்றமும் இல்லை என்றும், முதலமைச்சர் ஐந்து முறை கேரளாவுக்கு சென்றும் இந்த விவகாரத்தை பேசவில்லை என்றும் விமர்சித்தார். பாஜக ஆட்சி அமைந்தால், கேரள அரசுக்கு அழுத்தம் கொடுத்து செண்பகவல்லி அணை நிச்சயமாக சீரமைக்கப்படும் என உறுதி அளித்தார்.
தென்காசி மாவட்டத்தில் கனிம வளங்கள் அதிக அளவில் சட்டவிரோதமாக சுரண்டப்பட்டு வருவதாகவும், அவை கேரளாவுக்கு கடத்தப்படுவதாகவும் குற்றம்சாட்டினார். இதனை தடுக்க வேண்டும் என்றும் வலியுறுத்தினார். இதன் எதிரொலியாக, கனிம வள கொள்ளைக்கு எதிர்ப்பு தெரிவித்து, திமுக சுற்றுச்சூழல் அணி துணை அமைப்பாளராக இருந்த கடையம் பகுதியைச் சேர்ந்த சந்திரசேகர், தனது கட்சி பதவியிலிருந்து விலகியதாக கூறினார்.
இது தமக்கு ஆச்சரியத்தை ஏற்படுத்தியதாகவும், திமுகவிலும் சில நல்ல மனசாட்சியுள்ளவர்கள் இருப்பது மகிழ்ச்சியளிப்பதாகவும் அண்ணாமலை தெரிவித்தார். இது அரசியல் பேசும் மேடை அல்ல என்றாலும், அரசியல் மிகவும் முக்கியமானது என்றும் கூறினார்.
அரசியல் சரியான பாதையில் சென்றால் அது தமிழர்களின் பொங்கலாக இருக்கும்; அரசியல் தவறான நிலையில் இருந்தால் அது திமுக பொங்கலாக மாறிவிடும் என்றும், வெறும் இலவசங்களுக்காக மக்களை ஆடு மாடுகள் போல் கூட்டி நிறுத்துவதை அனுமதிக்கக் கூடாது என்றும் கடுமையாக விமர்சித்தார். தாய்மார்களை மரியாதையுடன் அழைத்து, கம்பீரமாக பொங்கல் விழாவை நடத்த வேண்டும் என்றும் வலியுறுத்தினார்.
நிகழ்ச்சி முடிவில், அனைவருக்கும் பொங்கல் திருநாள் வாழ்த்துகளை அண்ணாமலை தெரிவித்தார்.
