தைப்பொங்கல் 2026: பொங்கல் வைக்க உகந்த நேரம் மற்றும் சுப ஹோரைகள் – விரிவான தகவல்
தமிழர்களின் பாரம்பரியமும், பண்பாட்டுச் சிறப்பும் உலகிற்கு உணர்த்தும் முக்கிய திருநாள்களில் ஒன்றாக தைப்பொங்கல் பண்டிகை விளங்குகிறது. தமிழகத்தில் வடகிழக்கு பருவமழை முடிவடைந்து, வயல்கள் பசுமை போர்த்தி செழிப்புடன் காட்சியளிக்கும் இந்த காலகட்டத்தில், உழவுத்தொழிலுக்கும் இயற்கை அன்னைக்கும் நன்றி செலுத்தும் விழாவாக ஒவ்வோர் ஆண்டும் தை மாதத்தின் முதல் நாள் பொங்கல் பண்டிகையாக கொண்டாடப்படுகிறது.
சங்க காலம் முதல் தொடரும் தைப்பொங்கல் மரபு
தமிழர்களின் கலாசார அடையாளமாக விளங்கும் தைப்பொங்கல் விழா, பண்டைய சங்க காலம் முதலே கொண்டாடப்பட்டு வருவதாக வரலாற்றுச் சான்றுகள் தெரிவிக்கின்றன. ‘நற்றிணை’, ‘குறுந்தொகை’, ‘புறநானூறு’, ‘கலித்தொகை’ உள்ளிட்ட சங்க இலக்கியங்களிலும் பொங்கல் பண்டிகை குறித்த குறிப்புகள் இடம்பெற்றுள்ளன. இது தமிழர் வாழ்வியலோடு ஆழமாக பின்னிப்பிணைந்த விழா என்பதை எடுத்துக்காட்டுகிறது.
தீபாவளி என்றால் பட்டாசு, பலகாரம், புத்தாடை என்ற அடையாளம் இருப்பது போல, தைப்பொங்கலுக்கு இனிக்கும் செங்கரும்பும், மங்களகரமான மஞ்சள் குலையும் தனித்துவ அடையாளங்களாக திகழ்கின்றன.
நான்கு நாட்கள் கொண்டாடப்படும் பொங்கல் திருவிழா
முன்னொரு காலத்தில் ஒரு மாத காலம் வரை கொண்டாடப்பட்ட பொங்கல் பண்டிகை, இன்றைக்கு போகி, தைப்பொங்கல், மாட்டுப் பொங்கல், காணும் பொங்கல் என நான்கு நாட்கள் கொண்டாடப்படுகிறது. தைப்பொங்கலுக்கு முந்தைய நாளான மார்கழி மாதத்தின் இறுதி நாளில், “பழையன கழிதல்” என்ற மரபின்படி பழைய பொருட்களை எரித்து, புதிய வாழ்விற்கு வரவேற்பு அளிக்கப்படுகிறது.
சூரிய பகவானுக்கு நன்றி செலுத்தும் தைப்பொங்கல்
பொங்கல் தினத்தன்று அதிகாலை முதலே வீடுகளின் முற்றங்களில் கோலமிட்டு, கரும்பு, மஞ்சள் குலை ஆகியவற்றை அலங்கரித்து, மண்பானையில் பொங்கல் வைத்து சூரிய பகவானை வழிபடுவது மரபாக உள்ளது. சர்க்கரை பொங்கல், சக்கரைப் பாயசம் போன்றவை தயாரித்து குடும்பத்துடன் ஒன்றிணைந்து மகிழ்ச்சியுடன் பொங்கல் கொண்டாடப்படுகிறது.
அடுத்த நாளான மாட்டுப் பொங்கல், விவசாயிகளுக்கு உறுதுணையாக இருக்கும் மாடுகளுக்கு நன்றி தெரிவிக்கும் விழாவாக அனுசரிக்கப்படுகிறது. காணும் பொங்கல் நாளில் உறவினர்கள், நண்பர்களுடன் சுற்றுலா தலங்களுக்கு சென்று மக்கள் மகிழ்ச்சியாக பொழுதைக் கழிப்பார்கள்.
தைப்பொங்கல் 2026: பொங்கல் வைக்க உகந்த நேரம்
இந்த ஆண்டு வரும் தை 01 தேதி (ஜனவரி 15-ஆம் தேதி) (வியாழக்கிழமை) தைப்பொங்கல் பண்டிகை கொண்டாடப்படுகிறது. சாஸ்திரங்களின் படி, எந்தவொரு நல்ல காரியத்தையும் செய்யும் போது ராகு காலம், எமகண்டம் போன்ற நேரங்களை தவிர்ப்பது சிறந்ததாக கருதப்படுகிறது.
அதேபோல், பொங்கல் வைப்பதற்கும் குறிப்பிட்ட ஹோரைகள் உகந்ததாக சொல்லப்படுகிறது. செவ்வாய் அல்லது சூரியன் ஹோரையில் பொங்கல் வைப்பது தேவையற்ற மனஸ்தாபங்களை ஏற்படுத்தும் என்பதால் தவிர்க்க வேண்டும் என ஜோதிடர்கள் அறிவுறுத்துகின்றனர். சுக்கிரன், சந்திரன், குரு, புதன் ஹோரைகள் பொங்கல் வைப்பதற்கு சிறந்ததாக கருதப்படுகின்றன.
சூரிய உதயம் அடிப்படையில்
தை 01 தேதி (ஜனவரி 15-ம் தேதி) ஹோரை விவரம்
- காலை 6:39 முதல் 7:39 மணி வரை குரு ஹோரை இருந்தாலும், அது எமகண்ட நேரம் என்பதால் தவிர்க்க வேண்டும்.
-
மிக உகந்த நேரம் காலை 9:39 மணி முதல் 10:39 மணி வரை – சுக்கிர ஹோரை
- 10:39 மணி முதல் 11:39 மணி வரை – புதன் ஹோரை
- 11:39 மணி முதல் 12:39 மணி வரை – சந்திரன் ஹோரை
எனவே, காலை 9:39 மணி முதல் 12:39 மணி வரை உள்ள நேரத்தில் பொங்கல் வைப்பது சிறந்ததாகும்.
ஹோரை பலன்கள்
- சுக்கிர ஹோரையில் பொங்கல் வைத்தால் குடும்பத்தில் மகிழ்ச்சி, ஒற்றுமை, வம்ச விருத்தி அதிகரிக்கும்.
- புதன் ஹோரையில் பொங்கல் வைத்தால் குழந்தைகளின் கல்வி வளர்ச்சி, அறிவு மேம்பாடு ஏற்படும்.
- சந்திரன் ஹோரையில் பொங்கல் வைத்தால் மன அமைதி, குடும்ப சாந்தம் நிலவும்.
மதியம் 12 மணிக்குப் பிறகு சூரியன் உச்சிக்குச் செல்லும் காலம் தொடங்குவதால், அதற்குள் பொங்கல் வைத்து, சூரிய பகவானுக்கு நைவேத்யம் செய்து குடும்பத்துடன் உணவு அருந்துவது சிறந்ததாக கருதப்படுகிறது.
பிரம்ம முகூர்த்த நேரத்தில் பொங்கல் வைப்பதன் சிறப்பு
இவை தவிர, அதிகாலை 4:38 மணி முதல் 5:38 மணி வரை உள்ள பிரம்ம முகூர்த்த நேரத்திலும் பொங்கல் வைப்பது மிகவும் சிறப்பானதாக கருதப்படுகிறது. இந்த நேரத்தில் ராகு காலம், எமகண்டம் இல்லாததால், சூரிய உதயத்திற்கு முன்பே பொங்கல் வைத்து, உதய சூரியனை வழிபடுவது நம் பாரம்பரிய மரபாக உள்ளது.
மாட்டுப் பொங்கல்: கால்நடைகளுக்கு நன்றி
அடுத்த நாளான ஜனவரி 16-ஆம் தேதி மாட்டுப் பொங்கல் கொண்டாடப்படுகிறது. விவசாயத்திற்கு உற்ற துணையாக விளங்கும் மாடுகளை அலங்கரித்து, அவற்றுக்கு பொங்கல் வைத்து வழிபடுவது வழக்கம். அன்றைய தினம் காலை 7.30 மணி முதல் 10.30 மணி வரை, மற்றும் மதியம் 1.30 மணி முதல் 2.30 மணி வரை மாட்டுப் பொங்கலுக்கு நல்ல நேரமாகும்.
மாட்டுப் பொங்கல் அன்று ஜல்லிக்கட்டு போன்ற பாரம்பரிய விளையாட்டுகள் பல பகுதிகளில் வெகுவிமரிசையாக நடைபெறுகின்றன. வீட்டில் மாடுகள் இல்லாதவர்கள் சிவன் கோவிலில் உள்ள நந்தி பகவானை வழிபடலாம்.
இனிய ஆண்டிற்கான பிரார்த்தனை
இந்த தைப்பொங்கல் திருநாளில், அனைவரின் வாழ்விலும் கஷ்டங்கள் நீங்கி, சுபிட்சமும், அமைதியும், செழிப்பும் பெருக வேண்டும் என கடவுளை பிரார்த்தனை செய்து, குடும்பத்துடன் மகிழ்ச்சியாக பண்டிகையை கொண்டாடுவதே தைப்பொங்கலின் உண்மையான சிறப்பாகும்.
