தென் ஆப்பிரிக்காவுக்கு 277 ரன் இலக்கு – லாகூரில் சுவாரஸ்யம் காத்திருக்கும் டெஸ்ட்!
பாகிஸ்தான் மற்றும் தென் ஆப்பிரிக்கா அணிகள் இடையிலான முதல் டெஸ்ட் கிரிக்கெட் போட்டி லாகூரில் நடைபெற்று வருகிறது. இதன் முதல் இன்னிங்ஸில் பாகிஸ்தான் அணி 378 ரன்கள் எடுத்தது.
அதனைத் தொடர்ந்து விளையாடிய தென் ஆப்பிரிக்க அணி, 2-வது நாள் முடிவில் 67 ஓவர்களில் 6 விக்கெட்களுக்கு 216 ரன்கள் எடுத்தது. டோனி டி ஸோர்ஸி 81 ரன்களும், செனுரன் முத்துசாமி 6 ரன்களும் எடுத்துக் கொண்டு களத்தில் நீடித்தனர்.
நேற்று 3-வது நாள் ஆட்டத்தில் தென் ஆப்பிரிக்க அணி 84 ஓவர்களில் 269 ரன்களுக்கு ஆட்டமிழந்தது. தனது 2-வது டெஸ்ட் சதத்தை விளாசிய டோனி டி ஸோர்ஸி, 171 பந்துகளில் 2 சிக்ஸர்கள், 10 பவுண்டரிகளுடன் 104 ரன்கள் எடுத்து நோமன் அலி பந்தில் அவுட் ஆனார்.
செனுரன் முத்துசாமி 11, பிரேனலன் சுப்ராயன் 4, காகிசோ ரபாடா 0 ரன்களில் வெளியேறினர். பாகிஸ்தான் அணியில் நோமன் அலி 6 விக்கெட்களும், சஜித் கான் 3 விக்கெட்களும் பெற்றனர்.
109 ரன்கள் முன்னிலையுடன் பாகிஸ்தான் தனது 2-வது இன்னிங்ஸில் 46.1 ஓவர்களில் 167 ரன்களுக்கு ஆட்டமிழந்தது. பாபர் அஸம் 42, அப்துல்லா ஷபிக் 41, சவுத் ஷகீல் 38 ரன்கள் சேர்த்தனர். தென் ஆப்பிரிக்கா அணியில் செனுரன் முத்துசாமி 5 விக்கெட்களும், சைமன் ஹார்மர் 4 விக்கெட்களும் எடுத்தனர்.
இதனால் தென் ஆப்பிரிக்காவுக்கு 277 ரன்கள் இலக்கு நிர்ணயிக்கப்பட்டது. 3-வது நாள் முடிவில் அவர்கள் 22 ஓவர்களில் 2 விக்கெட்களுக்கு 51 ரன்கள் எடுத்திருந்தனர். எய்டன் மார்க்ரம் 3, வியான் முல்டர் 0 ரன்களில் வெளியேறினர்.
ரியான் ரிக்கெல்டன் 29, டோனி டி ஸோர்ஸி 16 ரன்களுடன் களத்தில் உள்ளனர். கைவசம் இன்னும் 8 விக்கெட்கள் இருக்க, வெற்றிக்கு மேலும் 226 ரன்கள் தேவை.
லாகூர் மைதானத்தில் இதற்கு முன் அதிகபட்சமாக வெற்றிகரமாக துரத்தப்பட்ட இலக்கு 208 ரன்கள்தான் — 1961-ல் பாகிஸ்தானுக்கு எதிராக இங்கிலாந்து அணி அடைந்த சாதனை. தென் ஆப்பிரிக்கா அணி இன்று இந்த இலக்கை மீறி வெற்றி பெற்றால், புதிய சாதனை படைக்கும்.
