“லபுஷேன் அல்ல, கோன்ஸ்டாஸை ஓப்பனராக விடலாம் — இங்கிலாந்து பவுலிங்கை சிதறடிப்பார்!” – வார்னர் கருத்து
ஆஸ்திரேலியா – இங்கிலாந்து ஆஷஸ் தொடரை முன்னிட்டு, தொடக்க வீரர் யார் என்ற விவாதம் சூடுபிடித்துள்ளது. உஸ்மான் கவாஜாவுடன் மார்னஸ் லபுஷேனேவா, இல்லையெனில் சாம் கோன்ஸ்டாஸாவா ஓப்பனராக வர வேண்டும் என்ற கேள்வி எழுந்துள்ளது.
லபுஷேன் பொதுவாக 3-ம் இடத்தில் விளையாடி 11 சதங்களைப் பெற்றுள்ளார். ஆனால் உலக டெஸ்ட் சாம்பியன்ஷிப் இறுதியில் ஓப்பனராக களமிறங்கிய அவர், இப்போது அந்த நிலையைத் தொடர்வாரா என்பது சந்தேகமாக உள்ளது. இதே சமயம், கோன்ஸ்டாஸுக்கு ஒரு வாய்ப்பு தர வேண்டுமா என்பதிலும் கலந்துரையாடல் நடைபெறுகிறது.
ஆஸ்திரேலிய கேப்டன் பாட் கமின்ஸ் லபுஷேனுக்கு ஆதரவாக, “அவர் சிறப்பாக ஆடிக் கொண்டிருக்கிறார்; கடந்த நான்கு ஆட்டங்களில் மூன்று சதங்கள் எடுத்துள்ளார். தன்னம்பிக்கையுடனும் தெளிவான நோக்கத்துடனும் விளையாடுகிறார்,” என்றார்.
ஆனால் டேவிட் வார்னர் இதனை மறுத்து, “லபுஷேன் ஓப்பனிங் வர வேண்டாம். அவர் 3-ம் இடத்தில் ஆடுவதே சரியானது. அதே சமயம் கோன்ஸ்டாஸை தொடக்க வீரராக அனுப்பி இங்கிலாந்து பவுலர்களை சோதித்துப் பார்க்கலாம்,” என்று கருத்து தெரிவித்தார்.
மார்க் வாஹோ லபுஷேனுக்கு ஆதரவாக, “அவரிடம் சிறந்த டெக்னிக் உள்ளது. இப்போது அவர் நம்பிக்கையுடனும் ஆட்டம் சிறப்பாகவும் உள்ளது. எனவே ஓப்பனராக லபுஷேனே, 3-ம் இடத்தில் ஸ்மித் வருவது சிறந்ததாக இருக்கும்,” என்றார்.
இந்நிலையில், கிரீன் மற்றும் வெப்ஸ்டர் ஆகியோர் நடுவரிசைக்கு பலம் சேர்ப்பார்கள் என்றும், முதல் ஆஷஸ் டெஸ்ட் போட்டி நவம்பர் 21-ம் தேதி பெர்த் மைதானத்தில் நடைபெறவுள்ளதாகவும் குறிப்பிடப்பட்டுள்ளது.
