பிஹார் சட்டப்பேரவைத் தேர்தல்: 71 வேட்பாளர்கள் கொண்ட முதல் பட்டியலை வெளியிட்டது பாஜக
பிஹார் சட்டப்பேரவைத் தேர்தலில் போட்டியிடவுள்ள 71 வேட்பாளர்களின் பெயர்களை உள்ளடக்கிய தனது முதல் பட்டியலை பாஜக (பாரதீய ஜனதா கட்சி) இன்று (அக்.14) வெளியிட்டுள்ளது.
பிஹாரில் நடைபெறவுள்ள சட்டப்பேரவைத் தேர்தல் நவம்பர் 6 மற்றும் 11 ஆகிய தேதிகளில் இரண்டு கட்டங்களாக நடைபெற உள்ளது. முதல் கட்டத்தில் 121 தொகுதிகளுக்கும், இரண்டாம் கட்டத்தில் 122 தொகுதிகளுக்கும் வாக்குப்பதிவு நடைபெறும்.
இந்த தேர்தலில், பாஜக – ஐக்கிய ஜனதா தளம் (ஜேடிஇயு) தலைமையிலான தேசிய ஜனநாயகக் கூட்டணி (NDA) மற்றும் ராஷ்ட்ரிய ஜனதா தளம் – காங்கிரஸ் தலைமையிலான மகாகட்பந்தன் கூட்டணி ஆகியவை முக்கிய எதிரணி அணிகளாக மோதுகின்றன. தொகுதிப் பங்கீடு கடந்த அக்டோபர் 12ஆம் தேதி முடிவடைந்தது. அதன்படி, பாஜக மற்றும் ஐக்கிய ஜனதா தளம் தலா 101 தொகுதிகளிலும், லோக் ஜனசக்தி கட்சி (ராம் விலாஸ்) 29 இடங்களிலும், ராஷ்ட்ரிய லோக் மோர்ச்சா மற்றும் இந்துஸ்தானி அவாமி மோர்ச்சா தலா 6 இடங்களிலும் போட்டியிடுகின்றன.
இந்நிலையில், 71 வேட்பாளர்கள் அடங்கிய பாஜகவின் முதல் பட்டியல் இன்று வெளியிடப்பட்டது. துணை முதல்வர் சாம்ராட் சவுத்ரி தாராபூர் தொகுதியில் போட்டியிட, மற்றொரு துணை முதல்வர் விஜய் குமார் சின்ஹா லக்கிசராய் தொகுதியில் களமிறங்குகிறார். அதேபோல், பாகல்பூர் தொகுதியில் ரோஹித் பாண்டே, பெகுசராய் தொகுதியில் குந்தன் குமார் ஆகியோரும் பாஜக வேட்பாளர்களாக அறிவிக்கப்பட்டுள்ளனர்.
பட்டியலில் மொத்தம் 9 பெண் வேட்பாளர்கள் இடம்பெற்றுள்ளனர். கால்நடை மற்றும் மீன்வளத்துறை அமைச்சர் ரேணு தேவி பேட்டியா தொகுதியில் போட்டியிடுகிறார். அதேபோல், ஸ்வீட்டி சிங் (கிஷன்கஞ்ச்), காயத்ரி தேவி (பரிஹார்), தேவந்தி யாதவ் (நர்பட்கஞ்ச்), ரமா நிஷாத் (ஆராய்), நிஷா சிங் (பிராந்த்பூர்), கவிதா தேவி (கோர்தா), அருணா தேவி (வார்சாலிங்கஞ்ச்) மற்றும் ஷ்ரேயாசி சிங் (ஜமாய்) ஆகியோரும் போட்டியிடவுள்ளனர்.
ஆனால், பாஜகவின் மூத்த தலைவரான நந்த கிஷோர் யாதவின் பெயர் இப்பட்டியலில் இல்லை. இதற்கு பதிலளித்த அவர், “கட்சியின் முடிவை நான் மதிக்கிறேன். பாஜக எனக்கு பல வாய்ப்புகளை வழங்கியுள்ளது. எனக்குப் புகார் எதுவும் இல்லை. புதிய தலைமுறைக்கு என் வாழ்த்துக்கள். பாட்னா சாஹிப் மக்களின் அன்பை என்றும் மறக்க மாட்டேன் — அவர்கள் என்னை ஏழு முறை தொடர்ச்சியாக வெற்றியாளனாக்கினர்” எனக் குறிப்பிட்டார்.
பிஹார் மாநிலத்தின் மொத்த 243 தொகுதிகளுக்கான வாக்குகள் நவம்பர் 14 அன்று எண்ணப்பட்டு அதே நாளில் முடிவுகள் அறிவிக்கப்படும்.
