இந்திய விமானப்படையின் திறனை உயரமாக மதித்த ரஷ்ய பாதுகாப்பு ஆய்வாளர்
‘ஆப்ரேஷன் சிந்தூர்’ நடவடிக்கையின் போது, இந்திய விமானப்படை மிக நீண்ட தூரத்தில் இருந்து பாகிஸ்தானின் கண்காணிப்பு விமானத்தை வெற்றிகரமாக தாக்கி வீழ்த்தியது, உலக ராணுவ வரலாற்றில் குறிப்பிடத்தக்க சாதனையாகும் என ரஷ்ய பாதுகாப்பு ஆய்வாளர்கள் பாராட்டியுள்ளனர். சர்வதேச கவனத்தை ஈர்த்துள்ள இந்த நிகழ்வின் பின்னணியை விரிவாக இங்கே பார்க்கலாம்.
ஜம்மு–காஷ்மீரின் பஹல்காம் பகுதியில் கடந்த ஏப்ரல் 22ஆம் தேதி நடைபெற்ற பயங்கரவாத தாக்குதலில், 25 சுற்றுலா பயணிகள் உட்பட 26 பேர் உயிரிழந்தனர். இந்த கொடூர தாக்குதலுக்குப் பாகிஸ்தானை மையமாகக் கொண்டு செயல்படும் லஷ்கர்-இ-தொய்பா அமைப்பும், அதன் கிளையான தி ரெசிஸ்டன்ஸ் ஃப்ரண்ட் அமைப்பும் பொறுப்பேற்றன.
இந்த தாக்குதலுக்குப் பதிலடியாக இந்தியா ‘ஆப்ரேஷன் சிந்தூர்’ என்ற ராணுவ நடவடிக்கையை தொடங்கியது. அதன் ஒரு பகுதியாக, கடந்த மே 7ஆம் தேதி பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் உள்ள பயங்கரவாத முகாம்களை குறிவைத்து இந்திய பாதுகாப்புப் படைகள் ஒருங்கிணைந்த தாக்குதல்களை நடத்தியது. இந்த தாக்குதல்களில் 9 தீவிரவாத முகாம்கள் முற்றிலும் அழிக்கப்பட்டதுடன், பல நூற்றுக்கணக்கான பயங்கரவாதிகள் கொல்லப்பட்டதாக தெரிவிக்கப்பட்டது.
இந்தியாவின் இந்த தீவிர நடவடிக்கையை எதிர்கொள்ள முடியாமல் பாகிஸ்தான் அரசின் வேண்டுகோளைத் தொடர்ந்து, மே 10ஆம் தேதி ‘ஆப்ரேஷன் சிந்தூர்’ தற்காலிகமாக நிறுத்தப்படுவதாக இந்தியா அறிவித்தது. இந்நிலையில், இந்த நடவடிக்கையின் போது இந்திய விமானப்படை, 314 கிலோமீட்டர் தொலைவில் இருந்து S-400 வான் பாதுகாப்பு அமைப்பை பயன்படுத்தி பாகிஸ்தானின் ஏவுகணையைத் தகர்த்ததாகவும், அதே நேரத்தில் அந்நாட்டின் AWACS கண்காணிப்பு விமானமும் தாக்குதலுக்கு உள்ளானதாகவும் தகவல்கள் வெளியாகின.
இந்த விவரங்களை இந்திய விமானப்படைத் தலைமைத் தளபதி ஏர் சீஃப் மார்ஷல் அமர் ப்ரீத் சிங் அதிகாரப்பூர்வமாக உறுதிப்படுத்தினார். பஞ்சாபில் நிலைநிறுத்தப்பட்ட S-400 வான் பாதுகாப்பு அலகு, 40N6E வகை ஏவுகணையை பயன்படுத்தி, பாகிஸ்தானின் பஞ்சாப் மாகாணம் டிங்கா பகுதியில் பறந்துகொண்டிருந்த AWACS விமானத்தை குறிவைத்துத் தாக்கியதாக அவர் விளக்கினார்.
இந்த நிலையில், ரஷ்ய பாதுகாப்பு நிபுணர் அலெக்ஸே மிக்காய்லோவ் பெட்ரென்கோ, இந்த தாக்குதல் S-400 அமைப்பின் தொழில்நுட்ப திறன்களுக்கு முற்றிலும் பொருந்துவதாக தெரிவித்துள்ளார். ரஷ்யா–உக்ரைன் போர் காலத்திலும் இதுபோன்ற தொலைதூர வான்வழித் தாக்குதல்கள் நிகழ்த்தப்பட்டுள்ளன என்றும், 2022ஆம் ஆண்டு ரஷ்யா S-300V4 அமைப்பை பயன்படுத்தி 217 கிலோமீட்டர் தொலைவில் இருந்த உக்ரைன் போர் விமானத்தை சுட்டு வீழ்த்திய நிகழ்வையும் அவர் நினைவூட்டினார்.
இந்த பின்னணியில், இந்திய விமானப்படை 314 கிலோமீட்டர் தொலைவில் இருந்து பாகிஸ்தானின் கண்காணிப்பு விமானத்தைத் தாக்கியது, உலகிலேயே மிக நீண்ட தூர வான் பாதுகாப்பு தாக்குதல்களில் ஒன்றாகக் கருதப்படுகிறது. இந்த தாக்குதல் பாகிஸ்தானின் கட்டளை மற்றும் கட்டுப்பாட்டு அமைப்புகளை கடுமையாக பாதித்ததுடன், இந்திய போர் விமானங்களுக்கு முக்கிய மூலோபாய முன்னேற்றத்தை ஏற்படுத்தியதாக பாதுகாப்பு ஆய்வாளர்கள் தெரிவிக்கின்றனர்.
மேலும், AWACS விமானத்திற்கு பாதுகாப்பாக நியமிக்கப்பட்டிருந்த பாகிஸ்தானின் JF-17 போர் விமானங்களும் தாக்குதலுக்கு உள்ளானதாக கூறப்படுகிறது. இதனை உறுதிப்படுத்தும் வகையில், சியால்கோட் அருகே சுமார் 200 கிலோமீட்டர் தொலைவில் ஒரு JF-17 விமானம் அழிக்கப்பட்டதாக சர்வதேச ஊடகங்களில் செய்திகள் வெளியாகின.
நான்கு நாட்கள் நீடித்த ‘ஆப்ரேஷன் சிந்தூர்’ நடவடிக்கையின் போது, S-400 அமைப்பின் மூலம் மொத்தம் 6 பாகிஸ்தான் விமானங்கள் அழிக்கப்பட்டதாகவும், பிரம்மோஸ் ஏவுகணை தாக்குதலில் போலாரி விமான தளத்தில் இருந்த இன்னொரு AWACS விமானமும் சேதமடைந்ததாகவும் தகவல்கள் தெரிவிக்கின்றன. இதனால் பாகிஸ்தானுக்கு 500 மில்லியன் டாலருக்கும் அதிகமான பொருளாதார இழப்பு ஏற்பட்டதாகவும், அதன் வான்வழி முன்னறிவிப்பு திறன் சுமார் 22 சதவீதம் வரை குறைந்ததாகவும் மதிப்பிடப்படுகிறது.
இந்திய விமானப்படையின் துல்லியமான தாக்குதல் திறன் மற்றும் உயர்தர மூலோபாயத் திட்டமிடலை பாராட்டியுள்ள ரஷ்ய ஆய்வாளர் பெட்ரென்கோ, ‘Shoot and Scoot’ போன்ற நவீன யுத்த நுட்பங்களை பயன்படுத்தி, எதிரியின் எதிர்-ரேடார் ஏவுகணைகளைத் தவிர்த்து இந்திய விமானப்படை தாக்குதல் நடத்திய விதம் குறிப்பிடத்தக்கது என தெரிவித்துள்ளார். ஆயுதங்களை தயாரிக்கும் நாடுகளைவிட, அவற்றை செயல்படுத்தும் இந்திய விமானப்படையின் திறமை மேலோங்கியுள்ளது என்றும் அவர் கூறியுள்ளார்.
இதன் மூலம், இந்திய விமானப்படையின் தொழில்நுட்ப நுட்பம், துல்லியம் மற்றும் மூலோபாய வலிமை சர்வதேச அளவில் மீண்டும் உறுதி செய்யப்பட்டுள்ளதாக பாதுகாப்பு வல்லுநர்கள் ஒருமித்த கருத்தை வெளியிட்டுள்ளனர்.
