திருப்பரங்குன்றம் பள்ளிவாசலில் கொடியேற்றம் – சந்தனக்கூடு திருவிழா தொடக்கம்
மதுரை: மதுரை மாவட்டம் திருப்பரங்குன்றத்தில் அமைந்துள்ள சிக்கந்தர் பாஷா பள்ளிவாசலில் நடைபெறும் சந்தனக்கூடு திருவிழாவை முன்னிட்டு, கொடியேற்ற நிகழ்ச்சி பாரம்பரிய முறையில் நடைபெற்றது.
இந்த நிகழ்வின் ஒரு பகுதியாக, கொடிமரம் மாட்டு வண்டியில் ஊர்வலமாக எடுத்துச் செல்லப்பட்டது. ஊர்வலத்தில் ஏராளமான இஸ்லாமியர்கள் கலந்துகொண்டு, மத பாடல்களை இசைத்தபடி உற்சாகமாக பங்கேற்றனர். ஊர்வலம் திருப்பரங்குன்றம் மலை அடிவாரத்தைச் சுற்றி சென்றதாக கூறப்படுகிறது.
தொடர்ந்து, திருப்பரங்குன்றம் மலை மேல் உள்ள தர்காவில் சிறப்பு வழிபாடு நடத்தப்பட்டது. பின்னர் கள்ளத்தி மரம் பகுதியில் கொடியேற்றம் நடைபெற்றது. இந்த கொடியேற்றத்துடன் சந்தனக்கூடு திருவிழா நிகழ்ச்சிகள் அதிகாரப்பூர்வமாக தொடங்கியுள்ளன.
திருவிழாவையொட்டி, திருப்பரங்குன்றம் பகுதியில் பாதுகாப்பு ஏற்பாடுகள் பலப்படுத்தப்பட்டுள்ளதாகவும், சட்டம் – ஒழுங்கு பாதிக்கப்படாத வகையில் போலீசார் கண்காணிப்பு பணியில் ஈடுபடுத்தப்பட்டுள்ளதாகவும் அதிகாரிகள் தெரிவித்தனர்.
சந்தனக்கூடு திருவிழா நடைபெறும் நாட்களில், தினசரி சிறப்பு வழிபாடுகள், நிகழ்ச்சிகள் நடைபெற உள்ளதாகவும், பக்தர்கள் அமைதியும் ஒற்றுமையும் கடைப்பிடிக்க வேண்டும் என பள்ளிவாசல் நிர்வாகம் வேண்டுகோள் விடுத்துள்ளது.
