தொழில்நுட்ப கோளாறால் ஏர்பஸ் விமானங்கள் மொத்தமாக சேவை நிறுத்தம் : உண்மையில் என்ன நடந்தது?
ஏர்பஸ் தயாரிக்கும் சில விமானங்களில் கண்டறியப்பட்ட முக்கிய தொழில்நுட்ப குறைபாடு காரணமாக, உலகம் முழுவதும் அவற்றின் சேவைகள் தற்காலிகமாக நிறுத்தப்பட்டுள்ளன. இந்தியாவிலும் ஏ-320 தொடர்வரிசை விமானங்களை அடுத்த அறிவிப்பு வரும் வரை பறக்க விடக்கூடாது என உத்தரவு பிறப்பிக்கப்பட்டுள்ளது. இந்த பிரச்னையின் பின்னணியை இங்கே பார்ப்போம்.
நெதர்லாந்தை தலைமையிடமாகக் கொண்ட ஏர்பஸ் நிறுவனம் உலகளவில் பயணிகள் மற்றும் ராணுவ விமானங்கள், மேலும் ஹெலிகாப்டர்கள் தயாரிக்கும் முன்னணி நிறுவனம். இதில் ஏ-320 குடும்பத்தைச் சேர்ந்த விமானங்கள் உலகம் முழுவதும் அதிகமாகப் பயன்படுத்தப்படும் மாடல்கள். 8,700 கி.மீ. வரை பறக்கும் திறன் கொண்ட இவை, 120–244 பயணிகளை ஏற்றிச் செல்லும் வசதியையும் கொண்டுள்ளன.
தற்போது உலகம் முழுவதும் 12,260 ஏ-320 வகை விமானங்கள் பறக்கின்றன. கடந்த அக்டோபர் 30-ஆம் தேதி ஜெட் ப்ளூ நிறுவனம் இயக்கிய ஒரு ஏ-320 விமானத்தில் நடுவானில் திடீர் கோளாறு ஏற்பட்டது. விமானம் தன்னுடைய கட்டுப்பாட்டை இழந்த நிலையில் இருந்தாலும், விமானிகள் தன்னடக்கத்துடன் செயல்பட்டு புளோரிடாவின் டம்பா விமான நிலையத்தில் பாதுகாப்பாக தரையிறக்கினர். இதனால் பெரிய விபத்து தவிர்க்கப்பட்டது. ஆனால் விமானத்தில் இருந்த 20 பயணிகள் காயமடைந்தனர்.
இந்நிலையில், விபத்துக்கான காரணத்தை கண்டறிய விசாரணை தொடங்கப்பட்டது. ஆய்வில், ELAC (Elevator Aileron Computer) எனப்படும் கட்டுப்பாட்டு கணினி அமைப்பில் கோளாறு இருப்பது கண்டுபிடிக்கப்பட்டது. விமானிகள் கொடுக்கும் கட்டளைகளை டிஜிட்டல் சிக்னல்களாக மாற்றி, விமானத்தின் முக்கிய பகுதிகளுக்கு அனுப்பும் முக்கிய பணி ELAC அமைப்பின் பொறுப்பு. இதன் செயல்பாட்டில் பிழை ஏற்பட்டிருந்தது.
இந்தப் பிழை ஒரு விமானத்தில் மட்டும் அல்ல, ஏ-320 வகை விமானங்களின் ஒரு குறிப்பிடத்தக்க எண்ணிக்கையில் கண்டறியப்பட்டதால், பிரச்சனை மிகுந்த கவலை அளித்தது.
இதனால் ஏர்பஸ் நிறுவனம், அனைத்து பாதிக்கப்பட்ட விமானங்களிலும் உடனடியாக சாஃப்ட்வேர் அப்டேட் செய்ய வேண்டும் என அறிவித்தது. உலகம் முழுவதும் உள்ள ஏ-320 விமானங்கள் பாதுகாப்புக் காரணங்களால் தரையிறக்கப்பட்டன. சுமார் 6,000 விமானங்களில் சீரமைப்பு மற்றும் மீள்தொடர்பு பணிகள் தீவிரமாக நடைபெற்று வருகின்றன.
இந்தியாவில் இண்டிகோ, ஏர் இந்தியா உள்ளிட்ட நிறுவனங்கள் 200-க்கும் மேற்பட்ட ஏ-320 விமானங்களை இயக்கி வருகின்றன. இந்திய விமான ஒழுங்குமுறை அமைப்பு, A318, A319, A321/5 மாடல்களையும் பரிசோதனை முடியும் வரை இயக்க வேண்டாம் என உத்தரவிட்டுள்ளது. இந்தப் பணிகள் திங்கள் அல்லது செவ்வாய்க்கிழமை வரை நீடிக்கும் எனவும் கூறப்பட்டுள்ளது.
அண்ட மற்றும் சூரிய கதிர்வீச்சு ஆய்வாளரான டாக்டர் இயன் கெட்லி, இந்த கோளாறு சரி செய்யாமல் விட்டால் சூரிய கதிர்வீச்சு தாக்கத்தால் விமானத்தின் கணினி தரவுகள் அழியும் அபாயம் உள்ளதாக எச்சரித்துள்ளார். 2003 ஆம் ஆண்டு லாஸ் ஏஞ்சல்ஸ்–நியூயார்க் விமானத்தில் இதே போன்ற தொழில்நுட்ப கோளாறு ஏற்பட்டதையும் அவர் குறிப்பிட்டார்.
சீரமைப்பு செய்ய ஒரே விமானத்திற்கு 3 மணி நேரத்திற்கும் குறைவாகவே ஆகும் என்றாலும், ஆயிரக்கணக்கான விமானங்களுக்கு ஒரே சமயம் இந்தப் பணியை செய்ய வேண்டியதால் உலகளவில் தாமதங்கள் ஏற்பட்டுள்ளன.
இதன் விளைவாக, உலகம் முழுவதும் போன்று இந்தியாவிலும் லட்சக்கணக்கான பயணிகள் விமான சேவை தாமதம், ரத்து, மாற்று விமான தேவை போன்ற சிரமங்களால் அவதியடைந்து வருகின்றனர்.
