தீபாவளி விளக்குகள் குறித்து அகிலேஷ் யாதவ் கருத்து சர்ச்சை – பாஜக கடும் விமர்சனம்
தீபாவளி பண்டிகையை முன்னிட்டு அரசு மிகுந்த அளவில் விளக்குகள் ஏற்றும் நடவடிக்கை குறித்து சமாஜ்வாதி கட்சி தலைவர் அகிலேஷ் யாதவ் வெளியிட்ட கருத்து அரசியல் சர்ச்சையை கிளப்பியுள்ளது.
ஒரு கூட்டத்தில் பேசிய அகிலேஷ் யாதவ், “ராமரின் பெயரில் ஒரு ஆலோசனையை வழங்க விரும்புகிறேன். உலகம் முழுவதும் கிறிஸ்துமஸ் பண்டிகையின் போது நகரங்கள் ஒளிர்கின்றன; அந்த ஒளி பல மாதங்கள் நீடிக்கிறது. நாம் அவர்களிடமிருந்து கற்றுக்கொள்ள வேண்டும். விளக்குகள், மெழுகுவர்த்திகள் போன்றவற்றில் இவ்வளவு பணம் செலவழிப்பதில் என்ன பொருள் உள்ளது? அரசாங்கம் இதனை மறுபரிசீலனை செய்ய வேண்டும்,” என தெரிவித்தார்.
அயோத்தியில் இந்தாண்டு தீபாவளியை முன்னிட்டு 26 லட்சத்திற்கும் மேற்பட்ட விளக்குகள் ஏற்ற தீர்மானம் எடுத்துள்ள உத்தரப்பிரதேச அரசை அவர் மறைமுகமாக விமர்சித்ததாகக் கருதப்படுகிறது.
அகிலேஷின் இந்தக் கருத்துக்கு பாஜக கடுமையாக எதிர்ப்பு தெரிவித்துள்ளது. கட்சியின் தேசிய செய்தித் தொடர்பாளர் வினோத் பன்சால், “முன்னாள் முதல்வர் தீபாவளி நேரத்தில் கிறிஸ்துமஸைப் புகழ்ந்து பேசுகிறார். இது ஒரு பில்லியன் இந்துக்களின் உணர்வுகளை புண்படுத்தும் வகையில் உள்ளது. அவர் இந்து மரபுகளை விட வெளிநாட்டு பண்டிகைகளை அதிகம் பாராட்டுகிறார்,” என்று விமர்சித்தார்.
மத்தியப் பிரதேச அமைச்சர் விஸ்வாஸ் சாரங் மேலும் கடுமையாகக் கண்டனம் தெரிவித்து, “அகிலேஷ் யாதவ் தீபாவளி வழிபாடு மற்றும் விளக்கேற்றத்தை எதிர்ப்பது ஆச்சரியமாக உள்ளது. அவரை அந்தோணி அல்லது அக்பர் என்று அழைப்பதே பொருத்தமாக இருக்கும். அவர் தன் மதத்தை மாற்றியிருக்கலாம்; இதுகுறித்து விசாரணை தேவை,” என்று கருத்து தெரிவித்தார்.
