தமிழகத்தில் SIR நடைமுறைக்கு எதிர்ப்பு – உச்சநீதிமன்றத்தை நாடிய திமுக!
தமிழகத்தில் வாக்காளர் பட்டியல் சிறப்பு தீவிர திருத்தம் (SIR) நடைமுறைக்கு எதிராக, திராவிட முன்னேற்றக் கழகம் உச்சநீதிமன்றத்தில் மனு தாக்கல் செய்துள்ளது.
இந்த விஷயத்தில் திமுக வெளியிட்ட அறிக்கையில்,
“முதல்வர் மு.ஸ்டாலின் தலைமையில் நவம்பர் 2-ஆம் தேதி சென்னையில் நடைபெற்ற அனைத்துக் கட்சிக் கூட்டத்தில், தமிழ்நாட்டில் உள்ள வாக்காளர்களின் வாக்குரிமையைப் பாதுகாக்க உச்சநீதிமன்றத்தை மட்டுமே நாட வேண்டிய நிலை உள்ளது என தீர்மானிக்கப்பட்டது. தேர்தல் ஜனநாயகத்தை உறுதிப்படுத்த, அனைத்து கட்சிகளும் இணைந்து உச்சநீதிமன்றத்தில் மனு அளிக்க ஒப்புதல் பெற்றன” என கூறப்பட்டுள்ளது.
அந்த தீர்மானத்தின் அடிப்படையில், இன்று திமுக அமைப்புச் செயலாளர் ஆர். எஸ். பாரதி, தமிழ்நாட்டில் SIR நடைமுறையை அமல்படுத்துவதைத் தடுக்க உச்சநீதிமன்றத்தில் வழக்கு தொடர்ந்துள்ளார். இந்த மனுவை மூத்த வழக்கறிஞர் என். ஆர். இலங்கோ, எம்.பி. தாக்கல் செய்துள்ளார்.
மனுவில், SIR-ஐ செயல்படுத்த இது சரியான நேரமல்ல என்றும், தேர்தல் ஆணையத்திற்கு இதை அமல்படுத்த அதிகாரமில்லை என்றும் கூறப்பட்டுள்ளது. மேலும், அரசியல் உரிமைகளை மீறி செயல்படுவதாகவும், தகுதியான வாக்காளர்கள் நீக்கப்படவும், தகுதியற்றவர்கள் சேர்க்கப்படவும் வாய்ப்பு உள்ள நடைமுறை இது என்றும் குறிப்பிடப்பட்டுள்ளது.
இந்த SIR நடைமுறை அமல்படுத்தப்பட்டால், தமிழ்நாட்டில் லட்சக்கணக்கான வாக்காளர்கள் வாக்குரிமையை இழக்கும் அபாயம் உண்டு என்று மனுவில் வலியுறுத்தப்பட்டுள்ளது. இந்த வழக்கு நவம்பர் 6 அல்லது 7 ஆம் தேதி விசாரணைக்கு வரும் என எதிர்பார்க்கப்படுகிறது.
