டெல்லியில் நடைபெற்ற என்.டி.ஏ கூட்டணி கூட்டம்: மிக நீண்டகாலப் பிரதமர் சாதனை படைத்த மோடிக்கு தலைவர்கள் திரண்டு பாராட்டு!
மத்தியில் பிரதமர் நரேந்திர மோடி தலைமையிலான அரசு அமைந்து வெற்றிகரமாக 12 ஆண்டுகள் நிறைவுபெறுவதையொட்டி, டெல்லி பாரத் மண்டபத்தில் தேசிய ஜனநாயகக் கூட்டணியின் (NDA) சிறப்புக் கூட்டமும் பாராட்டு விழாவும் மிக பிரம்மாண்டமாக நடைபெற்றது. சுதந்திர இந்தியாவின் மிக நீண்டகாலப் பிரதமர் என்ற வரலாற்றுச் சிறப்புமிக்கப் பெருமையையும், இமாலய மைல்கல்லையும் பிரதமர் மோடி எட்டியுள்ள நிலையில், என்.டி.ஏ கூட்டணியில் அங்கம் வகிக்கும் பல்வேறு மாநிலங்களைச் சேர்ந்த தலைவர்கள் அவருக்குப் பொன்னாடை மற்றும் சால்வைகளை அணிவித்துத் தங்களது நெகிழ்ச்சியான வாழ்த்துகளைத் தெரிவித்துக் கொண்டனர்.
இந்த உயர்நிலைக் கூட்டத்தில், தேசிய ஜனநாயகக் கூட்டணியின் முக்கியக் கூட்டணிக் கட்சிகளான அ.தி.மு.க சார்பில் முன்னாள் எம்பி தம்பிதுரை, பா.ம.க தலைவர் மருத்துவர் அன்புமணி ராமதாஸ், மகாராஷ்டிர முன்னாள் முதலமைச்சரும் சிவசேனா (ஷிண்டே பிரிவு) தலைவருமான ஏக்நாத் ஷிண்டே, தெலுங்கு தேசம் கட்சித் தலைவரும் ஆந்திர முதலமைச்சருமான சந்திரபாபு நாயுடு உள்ளிட்ட முன்னணித் தலைவர்களும், ஒட்டுமொத்த மத்திய அமைச்சர்களும் திரளாகப் பங்கேற்றனர். விழாவின் ஒரு நெகிழ்ச்சியான தருணமாக, கூட்டத்தின் இடையே விருந்தினர்களுக்காக ஏற்பாடு செய்யப்பட்டிருந்த ‘காரப்பொறி’ தின்பண்டத்தை, பிரதமர் நரேந்திர மோடியே நேசத்துடன் தன் கைகளால் அங்கிருந்த கூட்டணிக் கட்சித் தலைவர்கள் மற்றும் அமைச்சர்களுக்குப் பகிர்ந்து கொடுத்து உபசரித்தது அனைவரையும் நெகிழ வைத்தது.
