தேசப் பாதுகாப்பின் அரண்: 7 எல்லை நெடுஞ்சாலைகளை மத்திய அரசிடம் ஒப்படைத்தது மேற்கு வங்க அரசு!
கொல்கத்தா:
இந்தியாவின் மிக முக்கிய ராணுவ கேந்திரமாகவும், சர்வதேச வர்த்தகத்தின் நுழைவாயிலாகவும் கருதப்படும் வடகிழக்கு மாநிலங்களின் இணைப்பை உறுதி செய்ய, மேற்கு வங்க அரசு ஒரு வரலாற்றுச் சிறப்புமிக்க முடிவை எடுத்துள்ளது. தேசப் பாதுகாப்பிற்குப் பெரும் அச்சுறுத்தலாகவும் சவாலாகவும் விளங்கி வந்த “கோழியின் கழுத்து” (Chicken’s Neck) எனப்படும் சிலிகுரி வழித்தடப் பகுதியில் உள்ள 7 முக்கிய தேசிய நெடுஞ்சாலைகளை, இந்திய தேசிய நெடுஞ்சாலை ஆணையம் (NHAI) மற்றும் தேசிய நெடுஞ்சாலைகள் உள்கட்டமைப்பு மேம்பாட்டுக் கழகத்திடம் (NHIDCL) ஒப்படைக்க மாநில அரசு அதிகாரப்பூர்வ ஒப்புதல் அளித்துள்ளது.
ஆட்சி மாற்றத்திற்குப் பிறகு முதலமைச்சர் சுவேந்து அதிகாரி தலைமையிலான புதிய பாஜக அரசு பொறுப்பேற்றவுடன் எடுக்கப்பட்டுள்ள இந்த அதிரடி நடவடிக்கை, கிழக்கு இந்தியாவில் பல ஆண்டுகளாக முடங்கிக் கிடந்த உள்கட்டமைப்புப் பணிகளுக்குப் புதிய உயிர் கொடுத்துள்ளது.
சிலிகுரி வழித்தடம்: இந்தியாவின் ‘நெருக்கடிப் புள்ளி’ (Choke Point)
மேற்கு வங்க அரசிடம் இருந்து மத்திய அரசுக்கு மாற்றப்பட்டுள்ள இந்த 7 நெடுஞ்சாலைகளில் 5 சாலைகள், மாநிலத்தின் வடபகுதியில் உள்ள மிகக் குறுகிய நிலப்பரப்பான ‘சிலிகுரி காரிடார்’ (Siliguri Corridor) வழியாகச் செல்கின்றன.
- எல்லைகளின் சுழற்சி: வெறும் 22 கிலோமீட்டர் அகலம் மட்டுமே கொண்ட இந்தக் குறுகிய நிலப்பரப்பானது நேபாளம், பூட்டான் மற்றும் வங்கதேசம் ஆகிய மூன்று சர்வதேச நாடுகளால் சூழப்பட்டுள்ளது. மேலும், சிக்கிம் மாநிலத்திற்கு அப்பால் இதன் வடக்கே சீனா அமைந்துள்ளது.
- 5 கோடி மக்களின் வாழ்வாதாரம்: இந்தியாவின் பிரதான நிலப்பரப்பையும், வடகிழக்கில் உள்ள 7 மாநிலங்களையும் இணைக்கும் ஒரே தரைவழிப் போக்குவரத்துப் பாதை இதுமட்டுமே ஆகும். இந்த வழித்தடம் தடையற்ற முறையில் இயங்காவிட்டால், வடகிழக்கு மாநிலங்களில் வாழும் சுமார் 5 கோடி மக்களின் விநியோகச் சங்கிலி துண்டிக்கப்படுவதோடு, இந்திய ராணுவத்திற்குத் தேவையான கனரக தளவாடங்களைக் கொண்டு செல்வதும் சாத்தியமற்றதாகிவிடும்.
- இயற்கைச் சவால்கள்: சிக்கிம் மலைப்பகுதிகளில் அடிக்கடி ஏற்படும் நிலச்சரிவுகள் மற்றும் பருவமழைக் கால வெள்ளப் பெருக்குகள் இப்பகுதியில் சிவில் மற்றும் ராணுவ போக்குவரத்தை இதுவரை பெருமளவில் பாதித்து வந்தன.
முடங்கிய திட்டங்களுக்குக் கிடைத்த விடிவுகாலம்:
தேசப் பாதுகாப்பைக் கருத்தில் கொண்டு, மாநில பொதுப்பணித் துறையின் (PWD) கட்டுப்பாட்டில் இருந்த இந்த எல்லை நெடுஞ்சாலைகளைத் தியகமாக ஒப்படைக்குமாறு மத்திய சாலைப் போக்குவரத்து மற்றும் நெடுஞ்சாலைகள் அமைச்சகம் பலமுறை கோரிக்கை விடுத்திருந்தது. எனினும், முந்தைய மம்தா பானர்ஜி தலைமையிலான அரசு இதற்கு ஒத்துழைப்பு வழங்காததால், கொள்கை ரீதியான அங்கீகாரம் கிடைத்தும் கடந்த 12 மாதங்களுக்கும் மேலாகப் பல கோடி ரூபாய் மதிப்பிலான நெடுஞ்சாலைத் திட்டங்கள் முடங்கிக் கிடந்தன. தற்போது ஏற்பட்டுள்ள அரசியல் மாற்றத்திற்குப் பின், இந்த முட்டுக்கட்டை முழுமையாக உடைக்கப்பட்டுள்ளது.
நெடுஞ்சாலைகளின் விபரமும் கட்டுப்பாடுகளும்:
இந்த 7 நெடுஞ்சாலைகள் மேற்கு வங்கத்தின் மொத்த சாலை நெட்வொர்க்கில் வெறும் 2 சதவீதமே என்றாலும், மாநிலத்தின் ஒட்டுமொத்த சாலைப் போக்குவரத்தில் 40 சதவீதத்திற்கும் அதிகமான வர்த்தகக் போக்குவரத்தைக் கையாள்கின்றன.
தரைக்குக் கீழே 24 மீட்டர் ஆழத்தில் ‘நிலத்தடி ராணுவ ரயில்பாதை’:
நெடுஞ்சாலைகள் ஒப்படைக்கப்பட்டதைத் தொடர்ந்து, இப்பகுதியில் தற்போதிருக்கும் இரட்டைப் பாதை ரயில் வழித்தடத்தை, 6 வழப் பாதையாக (6-Lane Rail Network) பிரம்மாண்டமாகத் தரம் உயர்த்த மத்திய அரசு திட்டமிட்டுள்ளது.
இதன் ஒரு பகுதியாக, தீன் மைல் ஹாட் மற்றும் ரங்கபானி ரயில் நிலையங்களுக்கு இடையே, தரைமட்டத்திலிருந்து 24 மீட்டர் ஆழத்தில், சுமார் 40 கிலோமீட்டர் நீளத்திற்கு அதிரடி நிலத்தடி ரயில் பாதை (Underground Strategic Rail Line) அமைக்கப்படவுள்ளது. நவீன கால வான்வழித் தாக்குதல்கள், ஏவுகணை வீச்சுகள் மற்றும் அச்சுறுத்தலாக உருவெடுத்துள்ள ட்ரோன் (Drone Warfare) தாக்குதல்களிலிருந்து இந்தியாவின் முக்கிய ராணுவ விநியோகங்களையும், பீரங்கிப் போக்குவரத்துகளையும் பாதுகாப்பாகப் பயணிக்க வைக்க இந்த நிலத்தடி சுரங்கப்பாதை ஒரு தற்காப்பு அரணாகச் செயல்படும்.
எல்லைப் பாதுகாப்புப் படைக்கு (BSF) 120 ஏக்கர் நிலம்:
மேற்கு வங்கத்தில் புதிய அரசு பதவியேற்ற உடனேயே எடுத்த மற்றொரு அதிரடி நடவடிக்கையாக, எல்லைப் பாதுகாப்புப் படைக்கு (BSF) தேவையான உள்கட்டமைப்புகளை மேம்படுத்தப் பல ஆண்டுகளாக நிலுவையில் இருந்த 120 ஏக்கர் நிலத்தை முதலமைச்சர் சுவேந்து அதிகாரி உடனடியாக ஒதுக்கீடு செய்துள்ளார். இதன் மூலம் எல்லைப் பாதுகாப்புப் படை மற்றும் ரயில்வே அமைச்சகம் இணைந்து, அதிநவீன ஏவுகணை தளங்கள் (Advanced Missile Launchpads) உள்ளிட்ட பல அடுக்கு பாதுகாப்பு வளையங்களை எவ்வித நிர்வாகத் தடைகளும் இன்றி அமைக்க வழிவகை செய்யப்பட்டுள்ளது.
பொருளாதார மற்றும் லாஜிஸ்டிக்ஸ் புரட்சி:
இந்த எல்லைச் சாலைகள் சர்வதேசத் தரத்திற்கு மேம்படுத்தப்படுவதன் மூலம் பீகார், மால்டா, முர்ஷிதாபாத், நாடியா மற்றும் வடக்கு 24 பர்கானாஸ் உள்ளிட்ட பல்வேறு அண்டை மாவட்டங்களின் இணைப்பு வசதி மேம்படும். மிக முக்கியமாக, போக்குவரத்துச் செலவுகள் (Logistics Costs) பெருமளவில் குறைந்து, எல்லைப் பகுதி வர்த்தகம் பல மடங்கு அதிகரிக்கும் என்பதால், இம்முடிவு கிழக்கு இந்தியாவின் ஒட்டுமொத்தப் பொருளாதார வளர்ச்சியை அடுத்த கட்டத்திற்கு எடுத்துச் செல்லும் எனப் பொருளாதார வல்லுநர்கள் கணித்துள்ளனர்.
இந்தியாவின் இறையாண்மை மற்றும் எல்லைப் பாதுகாப்பிற்கு மிக முக்கியமான உத்தேச நகர்வாகப் பார்க்கப்படும் இந்த சாலைகள் ஒப்படைப்பு விவகாரம், மத்திய-மாநில அரசுகளின் இணக்கமான கூட்டுச் செயல்பாட்டிற்கு ஒரு சிறந்த உதாரணமாக மாறியுள்ளது என்பதில் ஐயமில்லை.
