தெலுங்கானாவில் கொடூரம்: பி.டெக் மாணவியை மிரட்டி மது குடிக்க வைத்து பாலியல் பலாத்காரம் – சக மாணவன் அதிரடி கைது!
ஹைதராபாத்: தெலுங்கானா மாநிலத்தில் டீ குடிக்கலாம் என காரில் அழைத்துச் சென்று, சக கல்லூரி மாணவியைக் கட்டாயப்படுத்தி மது குடிக்க வைத்துக் கற்பழித்த என்ஜினீயரிங் கல்லூரி மாணவனைப் போலீசார் அதிரடியாகக் கைது செய்து சிறையில் அடைத்துள்ளனர்.
தெலுங்கானா மாநிலம் யாதாத்திரி புவனகிரி மாவட்டம், சவுட்டுபள்ளி பகுதியைச் சேர்ந்த உதய் என்பவர், இப்ராஹிம்பட்டினத்தில் உள்ள ஒரு தனியார் என்ஜினீயரிங் கல்லூரியில் பி.டெக் மூன்றாம் ஆண்டு படித்து வந்தார். கடந்த 14-ஆம் தேதியன்று, உதய் தன்னுடன் படிக்கும் சக மாணவி ஒருவரை டீ குடிக்கலாம் எனக் கூறி, தில்சுக்நகரில் உள்ள ஒரு காபி ஷாப்பிற்குத் தனது காரில் அழைத்துச் சென்றுள்ளார்.
மிரட்டி மது கொடுத்து அராஜகம்: காபி ஷாப்பில் இருந்து மீண்டும் இப்ராஹிம்பட்டினத்திற்குத் திரும்பும் வழியில், அங்குள்ள ஒரு மதுக்கடையில் உதய் மது பாட்டில்களை வாங்கியுள்ளார். தொடர்ந்து, பி.டி.எல் சாலையில் உள்ள ஆள்நடமாட்டம் இல்லாத ஒரு வெறிச்சோடிய பகுதிக்கு மாணவியைக் காரில் கடத்திச் சென்ற உதய், அங்கு வைத்து அந்த மாணவியைக் கட்டாயப்படுத்தி, மிரட்டி மதுவைக் குடிக்க வைத்துள்ளார். இதில் அந்த மாணவிக்கு மது போதை தலைக்கேறி, மயக்க நிலைக்குச் சென்றுள்ளார்.
மாணவியின் இந்தச் சூழ்நிலையைத் தனக்குச் சாதகமாகப் பயன்படுத்திக் கொண்ட உதய், அவரை இப்ராஹிம்பட்டினத்தில் உள்ள ஒரு தனியார் தங்கும் விடுதிக்கு (Lodge) கடத்திச் சென்று, கொடூரமாகப் பாலியல் பலாத்காரம் செய்துவிட்டு அங்கிருந்து தப்பியோடியுள்ளார்.
மயக்கம் தெளிந்த பின்னர் பாதிக்கப்பட்ட மாணவி இதுகுறித்து இப்ராஹிம்பட்டினம் காவல் நிலையத்தில் கண்ணீருடன் புகார் அளித்தார். மாணவியின் புகாரின் பேரில் உடனடியாக வழக்குப் பதிவு செய்த போலீசார், தலைமறைவாக இருந்த குற்றவாளி உதயைத் தீவிரமாகத் தேடி அண்மையில் கைது செய்தனர். நீதிமன்றத்தில் ஆஜர்படுத்தப்பட்ட அவர், தற்போது சிறையில் அடைக்கப்பட்டுள்ளார். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.
