மக்கள்தொகை சரிவைத் தடுக்க அதிரடி: 3-வது குழந்தைக்கு ரூ.30,000; 4-வது குழந்தைக்கு ரூ.40,000 ஊக்கத்தொகை – சந்திரபாபு நாயுடு அறிவிப்பு!
அமராவதி:
ஆந்திர மாநிலத்தில் பிறப்பு விகிதம் மற்றும் மக்கள்தொகை வீழ்ச்சியைக் கட்டுப்படுத்தும் நோக்கில், 3 மற்றும் 4-வது குழந்தைகளைப் பெற்றெடுக்கும் தம்பதியினருக்கு நிதியுதவி வழங்கப்படும் என்று அம்மாநில முதலமைச்சர் சந்திரபாபு நாயுடு அதிரடி அறிவிப்பை வெளியிட்டுள்ளார்.
ஆந்திராவில் சமீபகாலமாக பிறப்பு விகிதம் வெகுவாகக் குறைந்து, மக்கள்தொகை வளர்ச்சி கடுமையான சரிவைச் சந்தித்து வருகிறது. இந்த மக்கள் தொகையியல் மாற்றத்தைச் சரிசெய்து, பிறப்பு விகிதத்தை மீண்டும் அதிகரிக்கச் செய்யும் பொருட்டு ஆந்திர அரசு பல்வேறு அதிரடி உத்திகளைக் கையாண்டு வருகிறது.
அதன் ஒரு பகுதியாக, மாநிலத்தில் இனி 3-வது குழந்தையைப் பெற்றுக் கொள்ளும் தம்பதியினருக்கு 30 ஆயிரம் ரூபாய் ஊக்கத்தொகையும், 4-வது குழந்தையைப் பெற்றுக் கொள்ளும் தம்பதியினருக்கு 40 ஆயிரம் ரூபாய் ஊக்கத்தொகையும் அரசாங்கத்தின் சார்பில் வழங்கப்படும் என முதலமைச்சர் சந்திரபாபு நாயுடு அதிகாரப்பூர்வமாக அறிவித்துள்ளார். இந்த முன்னோடித் திட்டம் அம்மாநில மக்கள் மத்தியில் பெரும் விவாதத்தையும் வரவேற்பையும் பெற்றுள்ளது.
