“சி.ஜோசப் விஜய் என நான்…” – நாளை முதல்வராக பதவியேற்பாரா? கவர்னரை இன்று சந்திக்கிறார்
தமிழக வெற்றிக் கழகத்தின் சட்டமன்றக் குழுத் தலைவராக நடிகர் விஜய் நேற்று ஒருமனதாக தேர்வு செய்யப்பட்டுள்ளார்.
தமிழக சட்டமன்றத் தேர்தலில் த.வெ.க. 108 இடங்களை கைப்பற்றியுள்ளது. அதேசமயம் தி.மு.க. கூட்டணி 73 இடங்களிலும், அ.தி.மு.க. கூட்டணி 53 இடங்களிலும் வெற்றி பெற்றுள்ளன. எந்த ஒரு கட்சிக்கும் தனிப்பெரும்பான்மை கிடைக்காத நிலை ஏற்பட்டுள்ளது. மொத்தம் 234 தொகுதிகளில் குறைந்தபட்சம் 118 இடங்களைப் பெற வேண்டும் என்பதே பெரும்பான்மை கணக்கு.
இதையடுத்து த.வெ.க. தலைவர் விஜய், வெற்றி பெற்ற வேட்பாளர்களை சந்தித்து ஆலோசனை நடத்தினார். அவர்களுக்கு வாழ்த்து தெரிவித்து, வெற்றியின் காரணங்களை கேட்டறிந்தார். பின்னர் நடைபெற்ற கூட்டத்தில் அவர் சட்டமன்றக் குழுத் தலைவராக ஒருமனதாக தேர்வு செய்யப்பட்டார்.
தனித்து ஆட்சி அமைக்க 118 இடங்கள் தேவைப்படும் நிலையில், 108 இடங்களுடன் இருக்கும் த.வெ.க., மற்ற கட்சிகளின் ஆதரவைப் பெற முயற்சி செய்து வருகிறது. பெரும்பான்மையை நிரூபிக்க 14 நாட்கள் அவகாசம் தருமாறு கவர்னருக்கு விஜய் மின்னஞ்சல் அனுப்பியுள்ளார்.
விஜய் இரண்டு தொகுதிகளில் (பெரம்பூர், திருச்சி கிழக்கு) போட்டியிட்டு இரண்டிலும் வெற்றி பெற்றுள்ளார். அதனால் ஒரு தொகுதியை ராஜினாமா செய்ய வேண்டிய நிலை உள்ளது. அவர் திருச்சி கிழக்கு தொகுதியை விடுவிப்பார் என தகவல்கள் தெரிவிக்கின்றன. இதனால் த.வெ.க.வின் எம்.எல்.ஏ. எண்ணிக்கை 107 ஆக குறையும். மேலும் சபாநாயகர் தேர்வு செய்யப்பட்டால், எண்ணிக்கை 106 ஆக குறையும். இதனால் ஆட்சி அமைக்க இன்னும் 12 இடங்கள் தேவைப்படுகிறது.
இதற்காக காங்கிரஸ் உள்ளிட்ட கட்சிகளுடன் பேச்சுவார்த்தைகள் நடைபெற்று வருகின்றன.
காங்கிரஸ் ஆதரவு தொடர்பான ஆலோசனை
த.வெ.க.வுக்கு ஆதரவு அளிப்பது குறித்து தமிழ்நாடு காங்கிரஸ் தலைவர் செல்வப்பெருந்தகை தலைமையில் சென்னை அண்ணா சாலையில் உள்ள ஒரு தனியார் விடுதியில் ஆலோசனை கூட்டம் நடைபெற்றது. இதில் மேலிட நிர்வாகிகள் கிரிஷ் சோடங்கர் மற்றும் நிவேதித் ஆல்வா பங்கேற்றனர். புதியதாக தேர்வு செய்யப்பட்ட 5 எம்.எல்.ஏ.க்களும் இதில் கலந்து கொண்டனர்.
கூட்டத்தில், டெல்லி தலைமை எடுக்கும் முடிவை ஏற்கத் தயாராக இருப்பதாக எம்.எல்.ஏ.க்கள் தெரிவித்தனர். பின்னர் விவரங்களை தெரிவிக்க கிரிஷ் சோடங்கர் டெல்லி சென்றார். அதனைத் தொடர்ந்து காங்கிரஸ் தலைமை நேற்று இரவு ஆலோசனை நடத்தியது.
அதன்பின் கே.சி. வேணுகோபால் செய்தியாளர்களிடம் கூறியதாவது: “தமிழ்நாட்டின் தற்போதைய அரசியல் நிலை குறித்து ஆலோசனை நடத்தப்பட்டது. காங்கிரஸ் தலைவர் மல்லிகார்ஜூன கார்கே, ராகுல் காந்தி உள்ளிட்டோர் இதில் கலந்து கொண்டனர். த.வெ.க. தலைவர் விஜய் ஆதரவு கோரியுள்ளார். மாநில மக்களின் தீர்ப்பை மதித்து, மதச்சார்பற்ற ஆட்சி அமைவதே எங்கள் நிலைப்பாடு. பா.ஜ.க. ஆட்சியை எந்த வகையிலும் அனுமதிக்கமாட்டோம். இறுதி முடிவை தமிழ்நாடு காங்கிரஸ் எடுக்க உத்தரவிடப்பட்டுள்ளது” என்றார்.
இந்நிலையில் இன்று சென்னை சத்தியமூர்த்தி பவனில் காங்கிரஸ் எம்.எல்.ஏ.க்கள் கூட்டம் நடைபெறுகிறது. இதில் த.வெ.க.வுக்கு ஆதரவு அளிப்பது குறித்து இறுதி முடிவு எடுக்கப்படும் என எதிர்பார்க்கப்படுகிறது.
கவர்னர் சந்திப்பு
இதேநேரம், தமிழக கவர்னர் ஆர்.என். ரவி இன்று சென்னை கிண்டி ராஜ்பவனில் இருப்பார். அதிக இடங்கள் பெற்ற கட்சி என்ற அடிப்படையில் விஜய்க்கு ஆட்சி அமைக்க அழைப்பு விடுக்கப்படலாம். அப்போது ஆதரவு கடிதங்களை அவர் சமர்ப்பிக்கலாம்.
முழு பெரும்பான்மை இல்லாவிட்டாலும், மற்ற கட்சிகளின் ஆதரவுடன் பெரும்பான்மையை நிரூபித்தால் ஆட்சி அமைக்க வாய்ப்பு உள்ளது.
நாளை பதவியேற்பு சாத்தியம்
இதனைத் தொடர்ந்து, நாளை அமைச்சரவை பதவியேற்பு விழாவை நடத்த விஜய் திட்டமிட்டுள்ளார். இதற்கான ஏற்பாடுகள் சென்னை தலைமைச் செயலகத்தில் நடைபெற்று வருகின்றன.
நேரு உள்விளையாட்டு அரங்கில் விழா நடைபெறலாம் என்றும், சுமார் 5,000 பேரை அழைக்க திட்டமிடப்பட்டுள்ளதாகவும் கூறப்படுகிறது. பாதுகாப்பு ஏற்பாடுகளும் தீவிரமாக செய்யப்பட்டு வருகின்றன.
“சி.ஜோசப் விஜய் என நான்…”
பதவியேற்பு விழாவில் முதலில் விஜய் மேடைக்கு வந்து, “சி.ஜோசப் விஜய் என நான்…” என்று முதலமைச்சர் பதவிப் பிரமாணம் மற்றும் ரகசியக் காப்பு பிரமாணம் ஏற்கிறார். பின்னர் மற்ற அமைச்சர்கள் ஒவ்வொருவராக பதவியேற்பார்கள்.
பின்னர் அமைச்சர்களுக்கு துறை ஒதுக்கீடு குறித்து கவர்னர் மாளிகை அறிவிப்பு வெளியிடும்.
முதல்வராக பொறுப்பேற்பு
அதனைத் தொடர்ந்து விஜய் தலைமைச் செயலகத்திற்கு சென்று பணிகளை தொடங்குவார். அமைச்சர்களும் தங்களது பொறுப்புகளை ஏற்கின்றனர். இடைக்கால சபாநாயகரை நியமித்து, சட்டசபை நடவடிக்கைகள் தொடங்கப்படும்.
மேலும், தேர்ந்தெடுக்கப்பட்ட எம்.எல்.ஏ.க்களின் பட்டியலை தேர்தல் ஆணையம் விரைவில் வெளியிடும் என தகவல்கள் தெரிவிக்கின்றன.
