“விஜய் அரசியலில் இன்னும் பார்க்க வேண்டியது நிறைய உள்ளது” – பாஜக தேசியத் தலைவர் நிதின் நபின் கருத்து!
தமிழக வெற்றிக் கழகத் தலைவர் விஜய் அரசியலில் நீண்ட தூரம் பயணிக்க வேண்டியுள்ளது என்றும், அவர் களத்தில் எவ்வளவு நேரம் செலவிடுகிறார் என்பதைப் பொறுத்தே அவரது அரசியல் எதிர்காலம் அமையும் என்றும் பாஜக தேசியத் தலைவர் நிதின் நபின் தெரிவித்துள்ளார். ஏஎன்ஐ (ANI) செய்தி நிறுவனத்திற்கு அளித்த பேட்டியில், விஜய்யின் அரசியல் வருகை குறித்து அவர் இந்தக் கருத்துகளைப் பகிர்ந்து கொண்டார்.
அரசியல் என்பது ஒரு முழுநேர அர்ப்பணிப்பு தேவைப்படும் பணி என்று குறிப்பிட்ட நிதின் நபின், விஜய்யுடன் கூட்டணி அமைப்பது குறித்த கேள்விக்குப் பதிலளிக்கையில், “பாஜக ஏற்கனவே அதிமுகவுடன் வலுவான கூட்டணியில் உள்ளது. எனவே அவருடன் ஏன் கூட்டணி வைக்க வேண்டும்?” என்று கேள்வி எழுப்பினார். மேலும், தமிழக பாஜக தலைவர் அண்ணாமலைக்கும் கட்சித் தலைமைக்கும் இடையே எந்த மனக்கசப்பும் இல்லை என்றும், அவர் மிகுந்த உற்சாகத்துடன் கூட்டணி வேட்பாளர்களை ஆதரித்துப் பிரசாரம் செய்து வருவதாகவும் அவர் விளக்கம் அளித்தார்.
தமிழகம் மற்றும் மேற்கு வங்க சட்டமன்றத் தேர்தல் முடிவுகள் அனைவரையும் ஆச்சரியத்தில் ஆழ்த்தும் வகையில் இருக்கும் என நம்பிக்கை தெரிவித்த அவர், தமிழகத்தில் ஒரு மிகப்பெரிய அரசியல் மாற்றம் நிகழப்போவது உறுதி என்றும் கூறினார். விஜய்யின் அரசியல் நகர்வுகள் குறித்து பாஜக தேசியத் தலைவர் வெளியிட்டுள்ள இந்தக் கருத்து, தமிழக தேர்தல் களத்தில் விவாதங்களை ஏற்படுத்தியுள்ளது.
