புதுச்சேரியில் பிரதமர் மோடியின் பிரம்மாண்ட ரோட் ஷோ: என்டிஏ வேட்பாளர்களுக்கு உற்சாக வாக்கு சேகரிப்பு!
புதுச்சேரி:
புதுச்சேரி சட்டப்பேரவைத் தேர்தலில் போட்டியிடும் தேசிய ஜனநாயகக் கூட்டணி (NDA) வேட்பாளர்களை ஆதரித்து, பிரதமர் நரேந்திர மோடி இன்று மாலை பிரம்மாண்டமான வாகனப் பேரணியை (Road Show) நடத்தினார்.
புதுச்சேரியின் முக்கியப் பகுதியான அஜந்தா சிக்னல் சந்திப்பில் இருந்து தொடங்கிய இந்த ரோட் ஷோ, காமராஜர் சாலை வழியாக சுமார் 1.5 கிலோ மீட்டர் தூரம் வரை நடைபெற்றது. அலங்கரிக்கப்பட்ட திறந்தவெளி வாகனத்தில் நின்றபடி பிரதமர் மோடி, சாலையில் இருபுறமும் திரண்டிருந்த ஆயிரக்கணக்கான பொதுமக்களை நோக்கி கையசைத்து வாக்கு சேகரித்தார். அப்போது, திரண்டிருந்த மக்கள் “மோடி மோடி” என முழக்கமிட்டதுடன், பிரதமர் மீது மலர்களைத் தூவி உற்சாக வரவேற்பு அளித்தனர்.
இந்த நிகழ்ச்சியில் புதுச்சேரி முதலமைச்சர் ரங்கசாமி, அமைச்சர்கள் மற்றும் என்டிஏ கூட்டணி கட்சித் தலைவர்கள் பங்கேற்று பிரதமருடன் வாகனத்தில் சென்றனர். இந்தப் பேரணியைத் தொடர்ந்து ஏ.எப்.டி (AFT) மைதானத்தில் நடைபெறும் பிரம்மாண்ட பொதுக்கூட்டத்திலும் பிரதமர் உரையாற்ற உள்ளார். பிரதமரின் வருகையை முன்னிட்டு புதுச்சேரி முழுவதும் பலத்த பாதுகாப்பு ஏற்பாடுகள் செய்யப்பட்டிருந்தன.
