மேற்காசிய போர்: நாட்டு மக்களைப் பாதுகாக்க மத்திய அமைச்சர்களுக்கு பிரதமர் மோடி அதிரடி உத்தரவு!
புதுடெல்லி: மேற்காசியாவில் நிலவி வரும் போர் பதற்றத்தால் இந்திய மக்களுக்கு ஏற்படும் பாதிப்புகளைத் தவிர்க்கவும், அவர்களைப் பாதுகாக்கவும் தேவையான அனைத்து முயற்சிகளையும் முன்னெடுக்குமாறு மத்திய அமைச்சர்களுக்குப் பிரதமர் நரேந்திர மோடி அறிவுறுத்தியுள்ளார்.
உயர்மட்ட ஆலோசனைக் கூட்டம்:
மேற்காசியப் போர் சூழல் குறித்து விவாதிக்க, டெல்லியில் பிரதமர் மோடி தலைமையில் பாதுகாப்புத் துறைக்கான மத்திய அமைச்சரவைக் கூட்டம் நடைபெற்றது. இதில் மத்திய அமைச்சர்கள் அமித் ஷா, ஜெ.பி. நட்டா, நிர்மலா சீதாராமன், சிவராஜ் சிங் சௌகான், பியூஷ் கோயல் மற்றும் வெளியுறவுத்துறை அமைச்சர் ஜெய்சங்கர் உள்ளிட்ட முக்கிய அமைச்சர்கள் கலந்து கொண்டனர். இந்தப் போரினால் ஏற்படக்கூடிய பொருளாதார மற்றும் சமூகத் தாக்கங்களைக் கையாளுவது குறித்து விரிவாக ஆலோசிக்கப்பட்டது.
அத்தியாவசியப் பொருட்களுக்கு உறுதி:
போர்ச் சூழலால் சர்வதேச அளவில் விநியோகச் சங்கிலி பாதிக்கப்பட வாய்ப்புள்ள நிலையில், இந்தியாவில் மக்களுக்குத் தேவையான அத்தியாவசியப் பொருட்கள் தட்டுப்பாடின்றி கிடைப்பதை உறுதி செய்ய வேண்டும் எனப் பிரதமர் வலியுறுத்தினார். மேலும், போரின் தாக்கத்தால் பாதிக்கப்படக்கூடிய பல்வேறு துறையினரின் பிரச்சினைகளைத் தீர்க்க சாத்தியமான அனைத்து நடவடிக்கைகளையும் போர்க்கால அடிப்படையில் எடுக்குமாறு அவர் உத்தரவிட்டார்.
வதந்திகளுக்கு முற்றுப்புள்ளி:
இக்கட்டான இச்சூழலில் தேவையற்ற வதந்திகள் பரவுவதைத் தடுக்க வேண்டியது அவசியம் என்று குறிப்பிட்ட பிரதமர், உண்மையான மற்றும் சரியான தகவல்கள் பொதுமக்களுக்கு உரிய நேரத்தில் தடையின்றி சென்றடைவதை அமைச்சகங்கள் உறுதி செய்ய வேண்டும் என எடுத்துரைத்தார். நாட்டின் பாதுகாப்பிலும் மக்களின் நலனிலும் எவ்வித சமரசமும் இன்றி மத்திய அரசு தீவிரமாகக் கண்காணித்து வருவதாக இக்கூட்டத்தின் வாயிலாகத் தெரிவிக்கப்பட்டுள்ளது.
