தவெக தலைவர் விஜய்யின் சொத்து மதிப்பு எவ்வளவு? – தேர்தல் பிரமாணப் பத்திரத்தில் வெளியான அதிரடித் தகவல்கள்!
சென்னை பெரம்பூர் தொகுதியில் போட்டியிடும் தமிழக வெற்றி கழகத் தலைவர் விஜய், தனது வேட்புமனுவுடன் தாக்கல் செய்துள்ள சொத்து விவரங்கள் தற்போது வெளியாகியுள்ளன. அதன்படி, அவருக்குச் சொந்தமாக 404 கோடி ரூபாய் மதிப்பிலான அசையும் சொத்துகளும், 115 கோடி ரூபாய் மதிப்பிலான அசையா சொத்துகளும் இருப்பதாகத் தெரிவிக்கப்பட்டுள்ளது. வாகனங்களைப் பொறுத்தவரை, BMW, TOYOTA, SWIFT உள்ளிட்ட 5 சொகுசு கார்களுடன், ஒரு TVS XL SUPER ரக இருசக்கர வாகனமும் தன்னிடம் இருப்பதாக அவர் குறிப்பிட்டுள்ளார்.
நிதியிருப்பு மற்றும் நகைகள் குறித்த விவரங்களில், சாலிகிராமத்தில் உள்ள IOB வங்கிக் கணக்கில் மட்டும் 213 கோடி ரூபாய் சேமிப்பாக வைத்துள்ளதாகவும், அவரிடம் 888 கிராம் தங்கம் மற்றும் 15 லட்சம் ரூபாய் மதிப்பிலான வெள்ளிப் பொருட்கள் இருப்பதாகவும் கூறப்பட்டுள்ளது. மேலும், விஜய்யின் மனைவி சங்கீதா பெயரில் 3 கிலோ தங்க நகைகள் இருப்பதாகவும், விஜய்யின் பெயரில் எந்தவிதமான கடன்களும் இல்லை என்றும் அந்தப் பிரமாணப் பத்திரத்தில் உறுதிபடத் தெரிவிக்கப்பட்டுள்ளது. தேர்தல் களத்தில் விஜய்யின் இந்தச் சொத்து விவரங்கள் தற்போது பேசுபொருளாகியுள்ளன.
