சோகம்: ராணிப்பேட்டை அருகே ஏரியில் குளித்த 3 பள்ளி மாணவர்கள் நீரில் மூழ்கி பலி!
ராணிப்பேட்டை:
ராணிப்பேட்டை அருகே ஏரியில் குளித்துக் கொண்டிருந்த பள்ளி மாணவர்கள் மூன்று பேர் நீரில் மூழ்கி உயிரிழந்த சோக சம்பவம் அப்பகுதியில் பெரும் சோகத்தை ஏற்படுத்தியுள்ளது.
ராணிப்பேட்டை சிப்காட் அருகே உள்ள திரு.வி.க நகரைச் சேர்ந்த பார்த்திபன், நித்திஷ் உள்ளிட்ட மூன்று மாணவர்கள் அங்குள்ள ஒரு தனியார் பள்ளியில் பயின்று வந்தனர். இவர்கள் இன்று மணியம்பட்டு பகுதியில் உள்ள ஏரிக்குக் குளிக்கச் சென்றுள்ளனர். ஏரியில் குளித்துக் கொண்டிருந்தபோது, மாணவர்களில் ஒருவர் எதிர்பாராதவிதமாக ஏரியின் ஆழமான பகுதிக்குச் சென்று நீரில் மூழ்கியுள்ளார்.
தத்தளித்துக் கொண்டிருந்த சக மாணவனைக் காப்பாற்றும் முயற்சியில் மற்ற இரு மாணவர்களும் உடனடியாக நீரில் குதித்துள்ளனர். ஆனால், நீச்சல் தெரியாததாலும் நீரின் வேகம் அதிகமாக இருந்ததாலும் மூன்று மாணவர்களும் அடுத்தடுத்து நீரில் மூழ்கி பரிதாபமாக உயிரிழந்தனர்.
தகவலறிந்து சம்பவ இடத்திற்கு விரைந்து வந்த தீயணைப்புத் துறையினர், நீண்ட போராட்டத்திற்குப் பிறகு மூன்று மாணவர்களின் உடல்களையும் மீட்டனர். உயிரிழந்த மாணவர்களின் உடல்கள் பிரேத பரிசோதனைக்காக அரசு மருத்துவமனைக்கு அனுப்பி வைக்கப்பட்டுள்ளன. பள்ளி மாணவர்கள் மூவர் ஒரே நேரத்தில் உயிரிழந்த சம்பவம் ராணிப்பேட்டை பகுதியில் பெரும் சோக அலையை ஏற்படுத்தியுள்ளது.
