தவெக-வை தனிமைப்படுத்தித் தோற்கடிக்க திமுக சதி: லட்சிய ஜனநாயக கட்சித் தலைவர் ஜோஸ் சார்லஸ் மார்டின் பகிரங்கக் குற்றச்சாட்டு!
பழனி:
தமிழக அரசியல் களத்தில் தமிழக வெற்றிக் கழகத்தின் (தவெக) வருகை பெரும் விவாதத்தை ஏற்படுத்தியுள்ள நிலையில், அக்கட்சியைத் திட்டமிட்டுத் தனிமைப்படுத்த திமுக முயற்சிப்பதாக லட்சிய ஜனநாயக கட்சியின் தலைவர் ஜோஸ் சார்லஸ் மார்டின் பரபரப்பு குற்றச்சாட்டை முன்வைத்துள்ளார்.
RelatedPosts
பழனியில் செய்தியாளர்களைச் சந்தித்த அவர், வரும் தேர்தலில் நடிகர் விஜய்யின் தமிழக வெற்றிக் கழகத்தைத் தனித்துப் போட்டியிட வைத்து, அதன் மூலம் அக்கட்சியைத் தோல்வியடையச் செய்வதே திமுகவின் முக்கியத் திட்டம் என்று தெரிவித்தார். மேலும், தமிழக வெற்றிக் கழகத்திற்குள் திமுகவினர் ஏற்கனவே ஊடுருவியுள்ளதாகவும் அவர் எச்சரித்தார்.
குறிப்பாக, ஆதவ் அர்ஜுனா மற்றும் ஜான் ஆரோக்கியசாமி போன்ற நபர்கள், தவெக மற்ற கட்சிகளுடன் கூட்டணி அமைப்பதைத் தடுக்கும் வேலைகளில் ஈடுபட்டு வருவதாக அவர் சாடினார். ஆதவ் அர்ஜுனா தவெக-வின் வளர்ச்சிக்கு முட்டுக்கட்டை போடும் வகையில் தனது அரசியல் உள்நோக்கங்களை (Agenda) மிகச் சரியாகச் செயல்படுத்தி வருவதாகவும் ஜோஸ் சார்லஸ் மார்டின் தனது பேட்டியில் கடுமையாகக் குறிப்பிட்டார்.
