திருப்பரங்குன்றம் மலை தர்காவுக்குச் சென்ற இஸ்லாமியர்கள் தடுப்பு: போலீசாருடன் கடும் வாக்குவாதம்
மதுரை திருப்பரங்குன்றம் மலை மீது அமைந்துள்ள சிக்கந்தர் பாதுஷா தர்காவிற்கு ரமலான் பண்டிகையையொட்டி தொழுகை நடத்தச் சென்ற இஸ்லாமியர்களைக் காவல்துறையினர் தடுத்து நிறுத்தியதால் அங்கு பரபரப்பு ஏற்பட்டது. ரமலான் பண்டிகையை முன்னிட்டு இன்று அதிகாலை முதலே ஏராளமான இஸ்லாமியர்கள் மலை மீதுள்ள தர்காவிற்குச் செல்ல முற்பட்டனர்.
அப்போது, பாதுகாப்புப் பணியில் ஈடுபட்டிருந்த காவல்துறையினர், மலைக்குச் செல்லும் ஒவ்வொருவரின் பெயர், முகவரி உள்ளிட்ட தனிப்பட்ட விவரங்களைப் பதிவு செய்த பிறகே அனுமதிக்க முடியும் என்று நிபந்தனை விதித்தனர். காவல்துறையினரின் இந்த அதிரடி நடவடிக்கைக்கு இஸ்லாமிய அமைப்பினர் கடும் எதிர்ப்பு தெரிவித்தனர்.
பண்டிகை காலங்களில் இதுபோன்ற கடுமையான கட்டுப்பாடுகளை விதிப்பது மத நல்லிணக்கத்திற்கு எதிரானது என்றும், இது தங்களின் மத உணர்வுகளைப் புண்படுத்துவதாகவும் கூறி இஸ்லாமியர்கள் காவல்துறையினருடன் வாக்குவாதத்தில் ஈடுபட்டனர். இந்தச் சம்பவத்தால் திருப்பரங்குன்றம் மலைப் பகுதியில் சிறிது நேரம் பதற்றமான சூழல் நிலவியது.
