அரசு மருத்துவமனைகளில் மருந்துத் தட்டுப்பாடு: புற்றுநோய் மற்றும் இதய நோயாளிகள் கடும் அவதி!
சென்னை/கோவை: தமிழகத்தில் உள்ள அரசு மருத்துவக் கல்லூரி மருத்துவமனைகளில் புற்றுநோய் மற்றும் இதய பாதிப்புகளுக்கான உயர்ரக மருந்துகள் இருப்பு இல்லாததால், ஏழை நோயாளிகள் உரிய சிகிச்சை பெற முடியாமல் தவித்து வருகின்றனர். குறிப்பாக, கோவையில் கடந்த மூன்று மாதங்களாக முக்கிய மருந்துகள் விநியோகிக்கப்படவில்லை என்ற புகார் எழுந்துள்ளது.
அதிகரிக்கும் பாதிப்பு – குறைந்து வரும் மருந்துகள்:
புற்றுநோய் பாதிப்பு கடந்த 2012-ஆம் ஆண்டில் 53,022-ஆக இருந்த நிலையில், 2025-ஆம் ஆண்டில் அது 1,00,097-ஆக உயர்ந்திருக்கலாம் எனக் கணிக்கப்பட்டுள்ளது. பாதிப்பு இவ்வளவு வேகமாக அதிகரித்து வரும் சூழலில், அனைத்து மருத்துவக் கல்லூரிகளிலும் புற்றுநோயியல் துறை இருந்தும், அதற்கான விலையுயர்ந்த தடுப்பு மருந்துகள் தட்டுப்பாடின்றி கிடைப்பதில்லை எனக் கூறப்படுகிறது.
RelatedPosts
வெளியில் வாங்க அறிவுறுத்தல்:
தற்போது சென்னை, கோவை உள்ளிட்ட முக்கிய நகரங்களில் உள்ள அரசு மருத்துவமனைகளில், மருத்துவர்களால் பரிந்துரைக்கப்படும் உயர்ரக மருந்துகளை மருத்துவமனை நிர்வாகமே கொள்முதல் செய்து தருவதில்லை எனத் தெரிகிறது. மாறாக, லட்சக்கணக்கான ரூபாய் மதிப்புள்ள இந்த மருந்துகளை நோயாளிகளே வெளியில் இருந்து வாங்கி வருமாறு அறிவுறுத்தப்படுவதாகப் புகார்கள் எழுந்துள்ளன.
கோவை மருத்துவமனையில் நிலவரம்:
குறிப்பாக, கோவை அரசு மருத்துவக் கல்லூரி மருத்துவமனையில் புற்றுநோய் சிகிச்சைக்கான மிக முக்கியமான ‘போர்டெசோமிப்’ (Bortezomib) என்ற ஊசி மருந்து கடந்த மூன்று மாதங்களாக இருப்பு இல்லை எனக் கூறப்படுகிறது. இதனால் சிகிச்சைக்காக வரும் நோயாளிகள் திருப்பி அனுப்பப்படுவதால், அவர்களின் உயிருக்கு ஆபத்து ஏற்படும் சூழல் உருவாகியுள்ளது.
ஏழை எளிய மக்களின் நலன் கருதி, தமிழக அரசு உடனடியாகத் தலையிட்டு உயிர் காக்கும் மருந்துகள் தட்டுப்பாடின்றி கிடைப்பதை உறுதி செய்ய வேண்டும் எனச் சமூக ஆர்வலர்கள் கோரிக்கை விடுத்துள்ளனர்.
