தமிழகத் தேர்தல் களம்: அதிமுக – பாஜக தொகுதிப் பங்கீடு இறுதி? நாளை சென்னை வருகிறார் பியூஷ் கோயல்!
சென்னை: தமிழகச் சட்டமன்றத் தேர்தலுக்கான கூட்டணிப் பேச்சுவார்த்தைகள் இறுதிக்கட்டத்தை எட்டியுள்ள நிலையில், அதிமுக – பாஜக இடையேயான தொகுதிப் பங்கீட்டை முடிவுக்குக் கொண்டுவர மத்திய அமைச்சர் பியூஷ் கோயல் நாளை சென்னை வரவுள்ளார். ஏற்கனவே இருமுறை பேச்சுவார்த்தைகள் நடத்தியும் இழுபறி நீடித்த நிலையில், இந்த முறை ஒப்பந்தம் கையெழுத்தாகும் என எதிர்பார்க்கப்படுகிறது.
காங்கிரஸை விட ஒரு தொகுதி கூடுதல்:
திமுக கூட்டணியில் காங்கிரஸ் கட்சிக்கு 28 தொகுதிகள் ஒதுக்கப்பட்டுள்ள நிலையில், தேசிய அளவில் தங்களுக்கு இருக்கும் செல்வாக்கைக் காட்ட பாஜக 29 தொகுதிகளை அதிமுகவிடம் கோரியுள்ளதாகத் தெரிகிறது. காங்கிரஸை விட ஒரு தொகுதியாவது கூடுதலாகப் போட்டியிட வேண்டும் என்பதில் பாஜக தலைமை பிடிவாதமாக இருப்பதால், அதிமுகவிற்கு இது புதிய அரசியல் நெருக்கடியை ஏற்படுத்தியுள்ளது.
எதிர்பார்க்கப்படும் தொகுதிகள்:
பாஜக தரப்பில் குறிப்பாகச் சென்னையில் வேளச்சேரி, தி.நகர், மயிலாப்பூர் ஆகிய தொகுதிகளும், கோவை, சேலம், மதுரை போன்ற மாவட்டங்களில் தலா இரண்டு தொகுதிகளும் கேட்கப்பட்டுள்ளன. இதில் சில தொகுதிகள் அதிமுகவின் கோட்டைகளாகக் கருதப்படுவதால், எடப்பாடி பழனிசாமி தரப்பில் இழுபறி நீடித்து வந்தது. இருப்பினும், நாளை மாலை நடைபெறவுள்ள ஆலோசனையில் சுமுக முடிவு எட்டப்பட்டு, நாளை மறுநாள் அதிகாரப்பூர்வமாக ஒப்பந்தம் கையெழுத்தாகும் என அரசியல் வட்டாரங்கள் தெரிவிக்கின்றன.
கூட்டணி கட்சிகளுக்கான பேச்சுவார்த்தை:
பாஜக தனது கணக்கில் அமமுக, தமாகா, புதிய நீதிக்கட்சி மற்றும் ஐஜேகே ஆகிய கூட்டணி கட்சிகளுக்கான இடங்களையும் சேர்த்துப் பேசி வருவதால், இந்தத் தொகுதிப் பங்கீடு மிகவும் முக்கியத்துவம் வாய்ந்ததாகக் கருதப்படுகிறது. பியூஷ் கோயல் மற்றும் எடப்பாடி பழனிசாமி இடையிலான இந்தச் சந்திப்பு, தமிழகத் தேர்தல் களத்தில் அதிமுக – பாஜக கூட்டணியின் வலிமையை உறுதிப்படுத்தும் முக்கிய நிகழ்வாகப் பார்க்கப்படுகிறது.
