ஈரான் – அமெரிக்கா போர்: ஈரானுக்கு உளவுத் தகவல்களை வழங்கி ரஷ்யா மறைமுக உதவி?
அமெரிக்கா மற்றும் இஸ்ரேலுக்கு எதிரான போரில் ஈரானுக்கு ஆதரவாக ரஷ்யா ரகசியத் தகவல்களை வழங்கி வருவதாக வெளியாகி இருக்கும் தகவல் சர்வதேச அரசியலில் பெரும் பரபரப்பை ஏற்படுத்தியுள்ளது. ரஷ்ய அதிபர் விளாடிமிர் புதின், நேற்று ஈரான் அதிபருடன் தொலைபேசி வாயிலாக உரையாடியதைத் தொடர்ந்து, அமெரிக்க ராணுவ இலக்குகளைத் துல்லியமாகத் தாக்குவதற்குத் தேவையான முக்கியத் தரவுகளை ரஷ்யா பகிர்ந்துள்ளதாக உளவுத்துறை வட்டாரங்கள் தெரிவிக்கின்றன.
ஈரானைச் சுற்றியுள்ள கடல் பகுதிகளில் நிலைநிறுத்தப்பட்டுள்ள அமெரிக்கப் போர்க்கப்பல்கள் மற்றும் வான்வெளியில் இயங்கும் போர் விமானங்களைக் கண்காணிப்பதற்கும், அவற்றின் மீது பதில் தாக்குதல் நடத்துவதற்கும் இந்தத் தகவல்கள் ஈரானுக்குப் பேருதவியாக இருக்கும் என்று ‘அசோசியேட்டட் பிரஸ்’ செய்தி நிறுவனம் அறிக்கை வெளியிட்டுள்ளது. ஏற்கனவே உக்ரைன் போரில் ஈரானின் ட்ரோன்களை ரஷ்யா பயன்படுத்தியதாக மேற்கத்திய நாடுகள் குற்றம் சாட்டி வந்த நிலையில், தற்போது ரஷ்யா வழங்கி வரும் இந்த மறைமுக ராணுவ உதவிகள், அமெரிக்கா – ரஷ்யா இடையிலான பனிப்போரை மேலும் தீவிரப்படுத்தும் என அரசியல் நிபுணர்கள் கருதுகின்றனர்.
