ஐரோப்பிய ஒன்றியத்தின் அதிரடித் தொழில் கொள்கை: அரசு ஒப்பந்தங்களில் இருந்து சீனாவை வெளியேற்றத் திட்டம்!
ஐரோப்பிய ஒன்றியத்தின் பொது நிதியுதவி மற்றும் அரசு ஒப்பந்தங்களில் இருந்து சீனாவை வெளியேற்றும் வகையிலான அதிரடிப் புதிய தொழில் கொள்கையை ஐரோப்பிய ஆணையர் ஸ்டீபன் செஜோர்னே அறிமுகப்படுத்தியுள்ளார். ‘ஐரோப்பிய முன்னுரிமை’ (European Preference) என்ற பெயரில் உருவாக்கப்பட்டுள்ள இந்த உத்தி, அனைத்துத் துறைகளிலும் ஐரோப்பாவின் தற்சார்பை அதிகரிப்பதை முதன்மை நோக்கமாகக் கொண்டுள்ளது. சீனத் தயாரிப்புகளின் அதீத இறக்குமதியால் ஐரோப்பாவின் வாகன உற்பத்தி மற்றும் எரிசக்தி துறைகளில் வேலைவாய்ப்புகள் பெருமளவில் பறிபோயுள்ளன. குறிப்பாக, இந்த ஆண்டு இறுதிக்குள் கார் உற்பத்தித் துறையில் மட்டும் சுமார் 6 லட்சம் வேலைகள் பறிபோகும் அபாயம் உள்ளதாகக் கணிக்கப்பட்டுள்ள நிலையில், அதனைத் தடுக்க இந்தப் புதிய சட்டம் கொண்டு வரப்பட்டுள்ளது.
இந்தப் புதிய விதிகளின்படி, ஐரோப்பாவில் தயாரிக்கப்படும் பொருட்களில் 70% பாகங்கள் ஐரோப்பிய ஒன்றியத்தைச் சேர்ந்ததாக இருக்க வேண்டும் என்பது கட்டாயமாக்கப்பட்டுள்ளது. மேலும், ஐரோப்பிய நிறுவனங்களுக்குத் தங்கள் சந்தையில் அனுமதி வழங்க மறுக்கும் நாடுகளுக்கு, ஐரோப்பிய ஒன்றியத்தின் பொது நிதி ஒப்பந்தங்களில் பங்கேற்க அனுமதி மறுக்கப்படும். சீன முதலீடுகளைக் கட்டுப்படுத்தும் விதமாக, 100 மில்லியன் யூரோக்களுக்கு மேலான வெளிநாட்டு நேரடி முதலீடுகளுக்குப் புதிய கடுமையான கட்டுப்பாடுகள் விதிக்கப்பட்டுள்ளன. இந்தத் திட்டம் முழுமையாக நடைமுறைக்கு வருவதற்கு ஐரோப்பிய நாடாளுமன்றம் மற்றும் ஐரோப்பிய ஒன்றிய கவுன்சிலின் இறுதி ஒப்புதல் பெறப்பட வேண்டியது அவசியமாகும்.
