30 ஆண்டுகளில் இல்லாத பின்னடைவு: திமுக ஆட்சியில் குறைந்த நாட்களே கூடிய தமிழகச் சட்டமன்றம்!
தமிழகச் சட்டமன்றக் கூட்டத்தொடர்: 30 ஆண்டுகளில் இல்லாத வகையில் குறைந்த நாட்கள் இயங்கிய அவலநிலை!
தமிழகச் சட்டமன்ற வரலாற்றில் கடந்த 30 ஆண்டுகளில் இல்லாத பின்னடைவாக, தற்போதைய திமுக ஆட்சியில் மிகக் குறைவான நாட்களே அவை கூட்டப்பட்டுள்ளதாக அதிர்ச்சித் தகவல் வெளியாகியுள்ளது. 2021-ஆம் ஆண்டு சட்டமன்றத் தேர்தலின் போது, ஆட்சிக்கு வந்தால் ஆண்டுக்குக் குறைந்தபட்சம் 100 நாட்கள் வரை சட்டமன்றக் கூட்டத்தொடர் நடத்தப்படும் என திமுக வாக்குறுதி அளித்திருந்தது. ஆனால், கடந்த ஐந்து ஆண்டுகளில் மொத்தமாக 161 நாட்கள் மட்டுமே சட்டமன்றம் கூடியுள்ளது. இது முந்தைய அதிமுக ஆட்சிக் காலங்களை விடக் குறைவானதாகும். 2011-2016 வரையிலான ஜெயலலிதா ஆட்சியில் 191 நாட்களும், அதனைத் தொடர்ந்த அதிமுக ஆட்சியில் 162 நாட்களும் சட்டமன்றம் நடைபெற்றது குறிப்பிடத்தக்கது.
சட்டமன்ற நாட்கள் குறைக்கப்பட்டது ஒருபுறமிருக்க, அவையின் நேரடி ஒளிபரப்பிலும் ஆளுங்கட்சி பாரபட்சம் காட்டுவதாகப் புகார்கள் எழுந்துள்ளன. குறிப்பாக, எதிர்க்கட்சித் தலைவர்கள் மற்றும் அதிமுக, பாஜக, பாமக உறுப்பினர்களின் விவாதங்கள் முறையாக நேரடி ஒளிபரப்பு செய்யப்படுவதில்லை எனக் கூறப்படுகிறது. மாறாக, கடந்த 20-ஆம் தேதியுடன் நிறைவடைந்த கூட்டத்தொடரில், முதலமைச்சரைப் புகழ்ந்து பேசிய கூட்டணிக் கட்சித் தலைவர்களின் உரைகள் மட்டும் முழுமையாக நேரடி ஒளிபரப்பு செய்யப்பட்டுள்ளன. மக்கள் நலன் சார்ந்த விவாதங்களுக்கு முக்கியத்துவம் அளிக்காமல், சட்டமன்ற நாட்களைக் குறைப்பது ஜனநாயக ஆர்வலர்களிடையே பெரும் அதிருப்தியை ஏற்படுத்தியுள்ளது.
