செஷல்ஸ் சுகாதார அமைப்பை வலுப்படுத்தும் சென்னை சிம்ஸ் மருத்துவக்குழு
செஷல்ஸ் நாட்டின் சுகாதார சேவைகளை மேம்படுத்தும் நோக்கில், சென்னை சிம்ஸ் மருத்துவமனை குழு முக்கியமான பணிகளை மேற்கொள்ள உள்ளதாக அறிவிக்கப்பட்டுள்ளது.
கடந்த ஆண்டு செஷல்ஸ் அதிபராக பதவியேற்ற பேட்ரிக் ஹொ்மினி, தனது முதல் இந்திய பயணமாக சமீபத்தில் இந்தியா வந்தார். இந்தப் பயணத்தின் போது, சென்னை சிம்ஸ் மருத்துவமனைக்கு சென்ற அவர், மருத்துவமனை தலைவர் ரவி பச்சமுத்துவை சந்தித்து விரிவான ஆலோசனைகளை நடத்தினார்.
இந்த சந்திப்பில், செஷல்ஸ் நாட்டில் மருத்துவ வசதிகளை உயர்த்துவது, நீண்டகால சுகாதாரத் தீர்வுகளை உருவாக்குவது உள்ளிட்ட முக்கிய அம்சங்கள் குறித்து விவாதிக்கப்பட்டதாக தெரிவிக்கப்பட்டுள்ளது.
இதன் தொடர்ச்சியாக, சிம்ஸ் மருத்துவக்குழுவைச் சேர்ந்த நிபுணர்கள் அடுத்த வாரம் செஷல்ஸ் மற்றும் மொரீஷியஸ் நாடுகளுக்கு பயணம் மேற்கொள்ள உள்ளனர். அங்கு உள்ள மருத்துவ சேவைகள், சுகாதார கட்டமைப்புகள் மற்றும் பராமரிப்பு வசதிகளை அவர்கள் நேரில் ஆய்வு செய்யவுள்ளனர்.
இந்த ஆய்வுகளின் அடிப்படையில், அந்த நாடுகளின் சுகாதார அமைச்சகங்களுடன் இணைந்து, மருத்துவ சேவைகளை மேம்படுத்தும் அடுத்த கட்ட நடவடிக்கைகளை சிம்ஸ் மருத்துவக்குழு செயல்படுத்தவுள்ளதாக தெரிவிக்கப்பட்டுள்ளது.
