மக்களின் எண்ணங்களில் மாற்றமின்றி சாதி அடையாளங்களை மாற்றுவது பயனற்றது – மதுரைக் கிளை உயர்நீதிமன்றம்
மக்கள் மனதில் வேரூன்றியுள்ள பாகுபாட்டு எண்ணங்களை நீக்காமல், பொது இடங்களில் காணப்படும் சாதிப் பெயர்களை மாற்றுவதால் எந்த அர்த்தமுள்ள பலனும் கிடையாது என உயர்நீதிமன்றத்தின் மதுரைக் கிளை தெரிவித்துள்ளது.
தமிழகத்தில் உள்ள கிராமங்கள், குடியிருப்புப் பகுதிகள், நீர்நிலைகள் உள்ளிட்ட இடங்களில் சாதி அடையாளங்களை வெளிப்படுத்தும் பெயர்களை நீக்க வேண்டும் என்று மாநில அரசு சமீபத்தில் உத்தரவு பிறப்பித்திருந்தது.
இந்த அரசாணையை எதிர்த்து பரமசிவம் என்பவர் மதுரைக் கிளை உயர்நீதிமன்றத்தில் மனுத் தாக்கல் செய்தார். அந்த மனுவில், ஏற்கனவே நிலவிவரும் பெயர்களை அகற்றுவது எளிதான காரியம் அல்ல என்பதால் அரசின் உத்தரவுக்கு தடை விதிக்க வேண்டும் என அவர் கோரிக்கை வைத்திருந்தார்.
இந்த வழக்கை விசாரித்த நீதிபதிகள் ஜி.ஜெயச்சந்திரன் மற்றும் கே.கே. ராமகிருஷ்ணன் அடங்கிய அமர்வு, மக்களின் மனங்களில் இருக்கும் வேறுபாடு எண்ணங்கள் நீங்காத நிலையில், பொது இடங்களில் உள்ள பெயர்களை மட்டும் மாற்றுவதால் என்ன பயன் கிடைக்கும்? என்று கேள்வி எழுப்பினர்.
அப்போது நீதிமன்றத்தில் ஆஜரான அரசு தரப்பு வழக்கறிஞர், பொது இடங்களில் சாதி பெயர்கள் அகற்றப்படும்போது, அதனூடாக மக்களின் சிந்தனையிலும் மாற்றம் உருவாகும் என வாதிட்டார்.
இவ்வாதத்தை பதிவு செய்துகொண்ட நீதிபதிகள், வழக்கின் மேலான விசாரணையை வரும் 9ஆம் தேதிக்கு ஒத்திவைத்து உத்தரவிட்டனர்.
