சனாதன தர்மத்தை அவமதிப்பவர்கள் மீண்டும் அதிகாரம் பெற முடியாது – அமித்ஷா பேச்சு
சனாதன தர்மத்தை இழிவுபடுத்தும் அணுகுமுறையுடன் செயல்படும் சக்திகள், நாட்டில் மீண்டும் ஆட்சியை பிடிக்க முடியாது என்று மத்திய உள்துறை அமைச்சர் அமித்ஷா தெரிவித்துள்ளார்.
குஜராத் மாநிலம் காந்திநகரில் நடைபெற்ற ஒரு நிகழ்ச்சியில் பங்கேற்று உரையாற்றிய அவர், சனாதன மரபுகளை மதிக்காமல், அதனை பின்பற்றும் மக்களை தவறாக வழிநடத்தும் அரசியல் அமைப்பு இந்தியாவில் மீண்டும் அதிகாரம் பெறும் வாய்ப்பே இல்லை என்ற உறுதியை வெளிப்படுத்தினார்.
நாட்டின் விடுதலைக்கு பிறகு பல ஆண்டுகளாக சனாதன வழிமுறைகளை பின்பற்றும் மக்கள், அந்த மரபுகளுக்கு உரிய மதிப்பளித்து, அதன் கோட்பாடுகளின் அடிப்படையில் செயல்படும் ஒரு ஆட்சியை எதிர்நோக்கி காத்திருந்தனர் என்றும் அவர் குறிப்பிட்டார்.
சனாதன தர்மத்தை புறக்கணிக்கும் அல்லது அவமதிக்கும் அரசுகள் மக்களின் ஆதரவை இழந்து விடும் என கூறிய அமித்ஷா, அதன் பண்பாட்டு மற்றும் ஒழுக்க மதிப்புகளை பாதுகாப்பது அனைவரின் கடமை என்றும் வலியுறுத்தினார்.
மேலும், 370வது பிரிவு நீக்கம், முத்தலாக் சட்ட ரத்து, பொது சிவில் சட்டம் போன்ற பாஜக அரசின் முக்கிய தீர்மானங்கள், இந்தியாவின் பண்பாட்டு, ஆன்மிக பாரம்பரியத்தை காக்கும் உறுதியின் வெளிப்பாடாகும் என்றும் அவர் தெரிவித்தார்.
