நெல் கொள்முதலில் திமுக அரசின் தவறுகள் என்னென்ன? – பட்டியலிட்டு சாடிய முன்னாள் அமைச்சர் காமராஜ்
நெல் கொள்முதல் செயல்பாடுகளில் திமுக அரசு பெரும் தோல்வி அடைந்துள்ளதாக அதிமுக முன்னாள் அமைச்சர் ஆர். காமராஜ் கடுமையாக விமர்சித்துள்ளார்.
சென்னை ராயப்பேட்டையில் உள்ள அதிமுக தலைமை அலுவலகத்தில் செய்தியாளர்களிடம் பேசிய அவர், தஞ்சாவூர் மற்றும் திருவாரூர் மாவட்டங்களில் அதிமுக பொதுச்செயலாளர் எடப்பாடி கே. பழனிசாமி மேற்கொண்ட ஆய்வின் போது பல குறைகள் வெளிச்சத்துக்கு வந்ததாகக் கூறினார்.
அவர் சுட்டிக்காட்டிய திமுக அரசின் நெல் கொள்முதல் குறைகள் பட்டியலாக
- நெல் முளைத்த நிலை: வயல்களில் அறுவடை செய்யப்படாத நெல் மழையால் முளைத்து நாசமாகியுள்ளது.
- மந்தமான கொள்முதல்: தினசரி 800–900 மூட்டைகள் மட்டுமே கொள்முதல் செய்கிறார்கள், ஆனால் அரசு 2,000 மூட்டைகள் என பொய்யான தகவல் தருகிறது.
- அரிசி அனுமதி தாமதம்: செறிவூட்டப்பட்ட அரிசி அனுமதி ஆகஸ்ட் 18-இலேயே வந்தது; ஆனால் அமைச்சர் தவறான தகவல் வழங்குகிறார்.
- நெல் தேக்கம்: ஒவ்வொரு கொள்முதல் நிலையத்திலும் 6,000–10,000 மூட்டைகள் தேங்கி கிடக்கின்றன; மொத்தம் 30 லட்சம் மூட்டைகள் வாங்கப்படாமல் உள்ளது.
- ஈரப்பத தளர்வு நடவடிக்கை இல்லை: மத்திய அரசிடம் 17% இலிருந்து 22% வரை ஈரப்பத தளர்வு பெற நடவடிக்கை எடுக்கப்படவில்லை.
- கிடங்கு பற்றாக்குறை: அதிமுக ஆட்சியில் 24 லட்சம் டன் கொள்ளளவுக்கு கிடங்குகள் இருந்தன; ஆனால் திமுக திறந்தவெளி கிடங்குகளைப் பற்றி தவறாக விளக்குகிறது.
- முன்னேற்பாடுகள் இல்லாமை: நெல் கொள்முதல் திட்டங்களில் எந்த முன்கூட்டிய ஏற்பாடுகளும் திமுக அரசு மேற்கொள்ளவில்லை.
“அதிமுக ஆட்சியில் இதுபோன்ற குளறுபடிகள் எதுவும் நடந்ததில்லை. நாங்கள் இருந்தபோது அனைத்து பணிகளும் நேரத்திற்கு முடிந்தன. இப்போது அரசு முழுமையாக தோல்வியடைந்துள்ளது,” என காமராஜ் சாடினார்.
