சென்னையில் குடியரசு தின விழாவுக்கான இரண்டாம் கட்ட ஒத்திகை நிகழ்ச்சி
சென்னை காமராஜர் சாலையில், வரவிருக்கும் குடியரசு தின விழாவை முன்னிட்டு இரண்டாவது நாள் அணிவகுப்பு பயிற்சி நிகழ்ச்சி சிறப்பாக நடைபெற்றது.
இந்தியாவின் 77-ஆவது குடியரசு தினம் ஜனவரி 26ஆம் தேதி நடைபெற உள்ளதை முன்னிட்டு, தமிழகம் முழுவதும் விழா ஒத்திகைகள் நடத்தப்பட்டு வருகின்றன. அதன் ஒரு பகுதியாக, சென்னையில் அமைந்துள்ள காமராஜர் சாலையில் கடந்த 19ஆம் தேதி முதல் கட்ட பயிற்சி நிகழ்ச்சி நடைபெற்றது. தொடர்ந்து, உழைப்பாளர் சிலை அருகே இரண்டாம் கட்ட அணிவகுப்பு ஒத்திகை நடத்தப்பட்டது.
இந்த பயிற்சியின் போது, ஆளுநர் ஆர். என். ரவி விழாவிற்கு வருகை தருவது போலக் காட்சிப்படுத்தப்பட்டு, அவரை வரவேற்று மரியாதை அணிவகுப்பு செலுத்தும் நிகழ்வும் ஒத்திகையாக நடத்தப்பட்டது.
இந்த அணிவகுப்பு பயிற்சியில் மாநில காவல்துறை வீரர்கள், மத்திய தொழில்துறை பாதுகாப்புப் படை உறுப்பினர்கள், தீயணைப்பு மற்றும் மீட்புப் பணியாளர்கள், தேசிய மாணவர் படை உறுப்பினர்கள் உள்ளிட்ட பல்வேறு பிரிவினர் பங்கேற்று தங்களின் திறமையை வெளிப்படுத்தினர்.
ஒத்திகை நிகழ்ச்சி நடைபெறுவதால், காமராஜர் சாலையில் குறிப்பிட்ட நேரங்களில் வாகன போக்குவரத்து முழுமையாகத் தடை செய்யப்பட்டது.
