“இந்து சமய அறநிலையத்துறையின் குற்றச்செயல்களை கடுமையாக கண்டிக்கிறோம்” – காடேஸ்வரா சுப்பிரமணியம்
சட்டவிரோத நடவடிக்கைகளில் ஈடுபடும் இந்து சமய அறநிலையத்துறையை கடுமையாக விமர்சிக்கிறோம் என்று இந்து முன்னணி மாநில தலைவர் காடேஸ்வரா சுப்பிரமணியம் தெரிவித்தார்.
இதுகுறித்து வெளியிட்டுள்ள அறிக்கையில், ஆளுநரின் மக்கள் மாளிகை வெளியிட்ட அறிக்கை, தமிழக அரசு மக்களுக்கான நலனில் எவ்வாறு செயல்படுகிறது என்பதை வெளிப்படுத்துகிறது என அவர் குறிப்பிட்டுள்ளார்.
அறிக்கையில், ஆயிரக்கணக்கான கோயில்களில் அறங்காவலர்களை நியமிக்காமை, நீதிமன்றத்தின் தீர்ப்புகளை அரசு கடைபிடிக்காமை, அதிகாரிகள் துணையுடன் முறைகேடுகள் நடைபெறுவது போன்ற குற்றச்சாட்டுகள் உள்ளன என அவர் கூறியுள்ளார்.
இந்த குற்றச்சாட்டிற்கு எதிராக இந்து சமய அறநிலையத்துறை அமைச்சர் சேகர் பாபு மற்றும் சட்ட அமைச்சர் ரகுபதி பதிலளித்தபோது, கோயில்களின் எண்ணிக்கை தொடர்பான தகவல்கள் முரண்பாடுள்ளன என்றும் காடேஸ்வரா சுப்பிரமணியம் தெரிவித்தார்.
சென்னை உயர்நீதிமன்றம் வழங்கிய வழிகாட்டுதல்களை பின்பற்ற இயலாமல் பல மாதங்கள் கழித்து இந்து சமய அறநிலையத்துறை சீராய்வு மனு தாக்கல் செய்துள்ளதாகவும், சட்ட அமைச்சர் ரகுபதி அவற்றை நிறைவேற்றியதாக தெரிவித்ததாகவும் அவர் குறிப்பிட்டார்.
“சட்ட அமைச்சருக்கு தமிழக அரசின் நிலைப்பாடு தெரியவில்லையா?” எனக் கேள்வி எழுப்பியுள்ளார்.
முடிவாக, ஆளுநர் அலுவலகம் குறிப்பிடும் குற்றச்சாட்டுகளை முழுமையாக விசாரித்து, தேவையான நடவடிக்கைகளை எடுக்க வேண்டும் என்று இந்து முன்னணி சார்பில் அவர் கோரிக்கை விடுத்துள்ளார்.
