திமுக வாக்குறுதிகள் நிறைவேற்ற கோரி மாநிலம் முழுவதும் சத்துணவு பணியாளர்கள் போராட்டம்
தேர்தல் காலத்தில் அளிக்கப்பட்ட உறுதிமொழிகளை நடைமுறைப்படுத்த வேண்டும் என வலியுறுத்தி, தமிழகத்தின் பல பகுதிகளில் சத்துணவு திட்ட ஊழியர்கள் ஒரே நேரத்தில் போராட்டங்களில் ஈடுபட்டனர்.
திருநெல்வேலி வண்ணாரப்பேட்டை பகுதியில் உள்ள செல்லபாண்டியன் சிலை அருகே, தமிழ்நாடு சத்துணவு ஊழியர் சங்க உறுப்பினர்கள் மறியல் மேற்கொண்டு அரசுக்கு எதிராக முழக்கங்களை எழுப்பினர். போராட்டம் தீவிரமானதைத் தொடர்ந்து அங்கு வந்த காவல்துறையினர் அவர்களை கைது செய்தனர்.
சிவகங்கை மாவட்டத்திலும் இதேபோன்ற போராட்டம் நடைபெற்றது. கைது நடவடிக்கையின் போது, சங்கத்தின் மாநிலச் செயலாளர் பாண்டி மீது காவல்துறையினர் தாக்குதல் நடத்தியதாக குற்றச்சாட்டு எழுந்தது. இதனால் ஆவேசமடைந்த ஊழியர்கள் போலீசாருக்கு எதிராக கடும் கண்டன கோஷங்களை எழுப்பினர்.
நாமக்கல் நகரில் பூங்கா சாலை பகுதியில் சத்துணவு பணியாளர்கள் சாலை மறியல் போராட்டத்தில் ஈடுபட்டனர். இதனைத் தொடர்ந்து, காவல்துறையினர் அவர்களை வலுக்கட்டாயமாக அகற்றி கைது செய்தனர்.
காஞ்சிபுரம் மாவட்ட ஆட்சியர் அலுவலகம் முன்பாகவும் சத்துணவு ஊழியர்கள் போராட்டம் நடத்தி, அரசு அளித்த வாக்குறுதிகளை உடனடியாக நிறைவேற்ற வேண்டும் என வலியுறுத்தினர். பின்னர் கைது செய்யப்பட்ட அவர்கள் தனியார் திருமண மண்டபத்தில் தங்க வைக்கப்பட்டனர்.
ராணிப்பேட்டை மாவட்டம் முத்துக்கடை பேருந்து நிலையம் அருகே நடைபெற்ற மறியல் போராட்டத்தில், தமிழ்நாடு சத்துணவு ஊழியர் சங்கத்தினர் தொடர்ச்சியான போராட்டங்களை முன்னெடுக்கப் போவதாக எச்சரிக்கை விடுத்தனர். அதன் பின்னர் அவர்களையும் காவல்துறையினர் கைது செய்தனர்.
