குளித்தலை அருகே ஜல்லிக்கட்டு விழாவில் அரசியல் சலசலம் – மேடை விவகாரத்தில் சர்ச்சை
கரூர் மாவட்டம் குளித்தலை அருகே நடைபெற்ற ஜல்லிக்கட்டு போட்டியின்போது, விழா மேடையில் இடம் வழங்கும் விவகாரத்தைச் சுற்றி திமுக மற்றும் அதிமுக நிர்வாகிகளுக்கிடையே சர்ச்சை எழுந்துள்ளது.
பொங்கல் பண்டிகையை முன்னிட்டு ஆர்.டி.மலை பகுதியில் ஜல்லிக்கட்டு போட்டி ஏற்பாடு செய்யப்பட்டிருந்தது. இந்தப் போட்டியை எம்.எல்.ஏ செந்தில்பாலாஜி தொடங்கி வைத்த நிலையில், விழா மேடையில் திமுக நிர்வாகிகள் மற்றும் ஆதரவாளர்கள் பெரும்பாலான இடங்களை கைப்பற்றியதாக கூறப்படுகிறது.
இதன் காரணமாக, அதிமுக முன்னாள் அமைச்சர் எம்.ஆர்.விஜயபாஸ்கருக்கு மேடையில் அமர இடம் கிடைக்கவில்லை என தகவல் வெளியாகியுள்ளது. குறிப்பாக, திமுக எம்.எல்.ஏ மாணிக்கம் தனது ஆதரவாளர்களுடன் இணைந்து இருக்கைகளை முழுவதும் பயன்படுத்திக் கொண்டதாக கூறப்படுகின்றது.
இந்த சம்பவம் இரு கட்சியினரிடையே வாக்குவாதமாக மாறிய நிலையில், அதிமுக நிர்வாகிகள் விழாவை விட்டு வெளியேறியதாக தெரிவிக்கப்படுகிறது. இதுதொடர்பாக கருத்து தெரிவித்த முன்னாள் அமைச்சர் எம்.ஆர்.விஜயபாஸ்கர், அழைப்பிதழ் வழங்கிய பிறகு கூட முறையான இருக்கை ஏற்பாடு செய்யப்படாதது ஏன் என கேள்வி எழுப்பினார்.
இந்த நிகழ்வு, ஜல்லிக்கட்டு விழாவில் அரசியல் நிழல் விழுந்ததாக விமர்சனங்களை எழுப்பியுள்ளது.
