மதுரை புதிய மேயர் நியமனம் 3 மாதங்களுக்கு தள்ளிவைக்கப்பட்டது – திமுக உட்கட்சி பூசல் காரணம்
மதுரை மேயர் பதவியில் இருந்த இந்திராணி ராஜினாமா செய்ததால், அவருக்கு பதிலாக புதிய மேயரை நியமிக்க திமுக தலைமை 3 மாதங்கள் தள்ளி வைக்க முடிவு செய்துள்ளது. இதனால் மதுரை திமுக கவுன்சிலர்களுக்கு அதிருப்தி ஏற்பட்டு உள்ளது.
மாநகராட்சி சொத்து வரி முறைகேட்டில் கணவர் பொன் வசந்த் சிறைக்கு சென்றதால், மேயர் இந்திராணியிடம் இருந்து ராஜினாமா கடிதம் பெற்றுப் பதவியை கட்சித்தலைமை பறித்தது. ஆனால் புதிய மேயரை தேர்வு செய்ய, கட்சியின் உள்ளக விரோதங்களால் உடனடியாக முடிவெடுக்க முடியவில்லை. இதனால் புதிய மேயர் நியமனத்தை 3 மாதங்களுக்கு தள்ளி வைக்க நேர்ந்தது.
திமுக மூத்த கவுன்சிலர்கள் கூறியதாவது:
“தேர்தல் நேரத்தில் கட்சிக்கு கெட்டபெயர் ஏற்படும் அபாயத்தால், மேயர் பதவியை இந்திராணியிடம் இருந்து பறித்தது. புறநகர் மாவட்ட திமுகவில் அமைச்சர் பி.மூர்த்தி கை ஓங்கிய நிலையில், அவரின் ஆதரவுடன் வாசுகியை மேயராக கொண்டுவர முயற்சி நடக்கிறது. ஆனால் மாநகர திமுகவினர், வேறொரு சமூகத்தை சேர்ந்தவருக்கு வாய்ப்பு வழங்க வேண்டும் என்று எதிர்ப்பு தெரிவிக்கின்றனர்.”
இந்த சூழலில், திமுக தலைமையின் முடிவு மாநகராட்சியில் துணை மேயர் (மார்க்சிஸ்ட் கம்யூ. கட்சி) அதிகாரத்தை அதிகரிக்க வாய்ப்பு உருவாக்கியுள்ளது. கவுன்சிலர்கள், புதிய மேயர் உடனடியாக நியமிக்கப்படாமால் கட்சிக்கு பின்னடைவு ஏற்படும் என்று தெரிவித்துள்ளனர்.
