விசாரணைக்கு தனி விமானத்தில் பயணித்த விஜய் – ரூ.40 லட்சம் வரை செலவு என தகவல்
சிபிஐ விசாரணைக்கு ஆஜராகுவதற்காக தமிழக வெற்றி கழக (தவெக) தலைவர் விஜய், தனி விமானத்தில் டெல்லி சென்று திரும்பியதாகவும், இதற்காக சுமார் 40 லட்சம் ரூபாய் வரை செலவு ஏற்பட்டிருக்கலாம் எனவும் தகவல்கள் வெளியாகியுள்ளன.
கரூர் துயர சம்பவம் தொடர்பான வழக்கில் சிபிஐ விசாரணை நடைபெற்று வரும் நிலையில், விசாரணைக்கு நேரில் ஆஜராகுவதற்காக விஜய் டெல்லிக்கு பயணம் மேற்கொண்டார். இந்தப் பயணத்திற்கு அவர் வணிக விமானத்தை பயன்படுத்தாமல், தனி விமானத்தை தேர்வு செய்ததாக கூறப்படுகிறது.
விஐபி நபர்கள், முன்னணி நடிகர்கள், அரசியல்வாதிகள் மற்றும் உயர் பாதுகாப்பு தேவைப்படும் முக்கிய பிரமுகர்கள், பாதுகாப்பு காரணங்கள், நேர மேலாண்மை மற்றும் தனியுரிமை ஆகியவற்றைக் கருத்தில் கொண்டு, தனி விமானங்களில் பயணம் செய்வது வழக்கமாக உள்ளது. அந்த வகையில், விஜயும் தனி விமானத்தில் டெல்லி சென்று விசாரணையில் பங்கேற்றதாக தெரிவிக்கப்படுகிறது.
தனி விமானங்களில் பயணம் செய்வோருக்கு, உணவருந்தும் வசதி, ஓய்வறை, தனிப்பட்ட சந்திப்பு அறை, பாதுகாப்பான பயண சூழல் உள்ளிட்ட பல்வேறு சிறப்பம்சங்கள் வழங்கப்படுகின்றன. விமானத்தை வாடகைக்கு எடுப்பதற்கான கட்டணம், எரிபொருள் செலவு, விமான நிலைய கட்டணங்கள், பணியாளர்களின் சேவை உள்ளிட்டவற்றை சேர்த்து கணக்கிட்டால், இந்த டெல்லி பயணத்திற்காக 40 லட்சம் ரூபாய் வரை செலவாகியிருக்கலாம் என விமான போக்குவரத்து துறை வட்டாரங்கள் தெரிவிக்கின்றன.
இந்நிலையில், விசாரணைக்கு ஆஜராக தனி விமானத்தில் பயணம் செய்தது குறித்து சமூக வலைதளங்களில் பல்வேறு விவாதங்களும் கருத்துகளும் வெளியாகி வருகின்றன. சிலர் இது அவரது தனிப்பட்ட விருப்பம் மற்றும் பாதுகாப்பு தொடர்பான முடிவு எனக் கூறி வருகின்றனர்; மற்றொருபுறம், அரசியல் தலைவராக உருவெடுத்து வரும் விஜயின் இந்தப் பயணம் கவனத்தை ஈர்த்துள்ளதாகவும் கருத்துகள் தெரிவிக்கப்படுகின்றன.
இதனிடையே, சிபிஐ விசாரணையில் முழுமையாக ஒத்துழைக்கத் தயாராக இருப்பதாகவும், சட்டத்தின் மீது நம்பிக்கை கொண்டுள்ளதாகவும் விஜய் தரப்பில் ஏற்கனவே தெரிவிக்கப்பட்டிருந்தது குறிப்பிடத்தக்கது.
