புதுச்சேரியில் குடும்ப அட்டையாளர் அனைவருக்கும் பொங்கல் பரிசுத் தொகுப்பு – முதல்வர் ரங்கசாமி தொடக்கம்
புதுச்சேரி மாநிலத்தில் வசிக்கும் அனைத்து ரேஷன் அட்டை வைத்திருப்பவர்களுக்கும் பொங்கல் விழாவை முன்னிட்டு சிறப்பு பரிசுத் தொகுப்பு வழங்கும் திட்டத்தை முதல்வர் ரங்கசாமி அதிகாரப்பூர்வமாக தொடங்கி வைத்தார்.
பொங்கல் திருநாளை கொண்டாடும் வகையில், ஒவ்வொரு குடும்ப அட்டையாளருக்கும் ரூ.750 மதிப்பில் 5 அத்தியாவசிய பொருட்கள் அடங்கிய தொகுப்பு வழங்கப்படும் என அரசு அறிவித்திருந்தது. இதில் 4 கிலோ பச்சரிசி, சமையல் எண்ணெய், 1 கிலோ நாட்டு சர்க்கரை, 1 கிலோ பாசிப் பருப்பு மற்றும் 300 மில்லி லிட்டர் நெய் ஆகியவை இடம்பெறுகின்றன.
இந்தத் திட்டத்தின் தொடக்க நிகழ்ச்சி திலாஸ்பேட்டையில் செயல்படும் ரேஷன் கடையில் நடைபெற்றது. அங்கு முதல்வர் ரங்கசாமி நேரில் சென்று பொதுமக்களுக்கு பொங்கல் தொகுப்புகளை வழங்கி திட்டத்தை ஆரம்பித்தார்.
இந்த நிகழ்வில் சபாநாயகர், அமைச்சரவை உறுப்பினர்கள், சட்டமன்ற உறுப்பினர்கள் மற்றும் அரசு அதிகாரிகள் உள்ளிட்ட பலர் கலந்து கொண்டனர்.
