திமுக அண்ணா அறிவாலய முற்றுகை போராட்டம் – தூய்மை தொழிலாளர்கள் மீது காவல்துறை வழக்குகள்!
திமுகவின் தலைமையகமான அண்ணா அறிவாலயம் உள்ளிட்ட பல இடங்களில் போராட்டங்களில் ஈடுபட்ட ஆயிரத்துக்கும் அதிகமான தூய்மை தொழிலாளர்கள் மீது காவல்துறையினர் வழக்குப்பதிவு மேற்கொண்டுள்ளனர்.
சென்னை மாநகராட்சியின் 5 மற்றும் 6வது மண்டலங்களில் பணியாற்றி வரும் தூய்மை தொழிலாளர்கள், தங்களது பணியை நிரந்தரமாக்க வேண்டும் என்றும், தூய்மை பணிகளை தனியார் நிறுவனங்களுக்கு ஒப்படைப்பதை நிறுத்த வேண்டும் என்றும் வலியுறுத்தி கடந்த ஐந்து மாதங்களாக தொடர்ச்சியான போராட்டங்களை நடத்தி வருகின்றனர்.
இந்தக் கோரிக்கைகளை முன்னிறுத்தி, அவர்கள் சாலை அடைப்பு, உண்ணாவிரதம், உள்ளிருப்பு போராட்டம், கடலில் இறங்கி நடத்தப்பட்ட போராட்டம் உள்ளிட்ட பல்வேறு கட்ட எதிர்ப்பு நடவடிக்கைகளில் ஈடுபட்டனர். இதன் ஒரு பகுதியாக, திமுக தலைமை அலுவலகமான அண்ணா அறிவாலயத்தை சூழ்ந்து கொண்டு சாலை மறியல் போராட்டமும் நடைபெற்றது.
அதேபோல், காமராஜர் சாலையில் அமைந்துள்ள கருணாநிதி நினைவிடம், ஓமந்தூரார் அரசு மருத்துவமனை, ரிப்பன் மாளிகை உள்ளிட்ட பல பகுதிகளிலும் தூய்மை தொழிலாளர்கள் போராட்டங்களில் ஈடுபட்டனர்.
இந்த சூழலில், சென்னையின் பல இடங்களில் நடைபெற்ற போராட்டங்களில் பங்கேற்ற ஆயிரத்திற்கும் மேற்பட்ட தூய்மை தொழிலாளர்கள் மீது காவல்துறையினர் வழக்குப்பதிவு செய்து, விசாரணை நடவடிக்கைகளை தீவிரப்படுத்தியுள்ளனர்.
