சிவகாசி அருகே வீட்டுக் கேட் இடிந்து விழுந்து இரு சிறுமிகள் பலி
விருதுநகர் மாவட்டத்தில் உள்ள சிவகாசி அருகேயான பகுதியில், வீட்டு வாசலில் அமைந்திருந்த இரும்புக் கேட் திடீரென சரிந்து விழுந்ததில் இரண்டு சிறுமிகள் உயிரிழந்த சம்பவம் பெரும் சோகத்தை ஏற்படுத்தியுள்ளது.
கொங்கலாபுரம் பகுதியைச் சேர்ந்த ராஜாமணி என்பவரின் இல்லத்தின் முன்புறத்தில், அவரது மகள் கமலிகா மற்றும் உறவினரின் மகளான ரிஷிகா ஆகிய இரு சிறுமிகளும் விளையாடிக் கொண்டிருந்தனர்.
அப்போது எதிர்பாராத விதமாக வீட்டின் கேட் நிலை தளர்ந்து, சிறுமிகள் மீது முழுவதுமாக இடிந்து விழுந்தது. இதனால் இருவரும் கேட்டின் கீழ் சிக்கிக்கொண்டனர்.
சம்பவ நேரத்தில் அருகில் யாரும் இல்லாததால், உடனடியாக மீட்புப் பணிகள் மேற்கொள்ள முடியாமல் போனதாக கூறப்படுகிறது. இந்த விபத்தில் பலத்த காயமடைந்த கமலிகா மற்றும் ரிஷிகா இருவரும் சம்பவ இடத்திலேயே உயிரிழந்தனர்.
தகவல் கிடைத்ததும் அங்கு விரைந்த காவல்துறையினர், இரு சிறுமிகளின் உடல்களையும் மீட்டு, உடற்கூறு ஆய்விற்காக சிவகாசி அரசு மருத்துவமனைக்கு அனுப்பி வைத்தனர்.
