அசைவ உணவு ரசிகர்களுக்கு அதிர்ச்சி: கறிக்கோழி இறைச்சி இனி குறைவா?
தமிழகத்தில் கறிக்கோழி பண்ணை விவசாயிகள் உற்பத்தி நிறுத்தும் போராட்டத்தை அறிவித்துள்ளனர். இதனால் பொதுமக்களின் முக்கிய புரோட்டின் ஆதாரமான கோழி இறைச்சி விலைகள் உயரும் அபாயம் ஏற்பட்டுள்ளது. இதுகுறித்த முக்கிய தகவல்களை இங்கே பார்க்கலாம்.
தமிழ்நாட்டில் அசைவ உணவு விரும்புபவர்கள் பெரும்பாலும் கோழி இறைச்சியை அடிப்படை உணவாகப் பயன்படுத்துகின்றனர். தமிழகத்தில் தினசரி சுமார் மூன்று லட்சம் கிலோ கோழி இறைச்சி விற்பனை செய்யப்படுகிறது. ஞாயிற்றுக்கிழமைகளில் இந்த அளவு நான்கு லட்சம் கிலோ வரை உயரும். முன்பு, கோழி இறைச்சி பொதுமக்களுக்கு எளிதில் கிடைக்காத நிலையில் இருந்தது; ஆனால் கறிக்கோழி பண்ணை வளர்ச்சி தொடங்கிய பிறகு, பொதுமக்களும் இதனை எளிதில் பயன்படுத்தக் தொடங்கினர்.
குறைந்த விலை, அதிக புரோட்டின் உள்ளடக்கம் ஆகிய காரணங்களால் கோழி இறைச்சி சாதாரண மக்களின் விருப்ப உணவாக மாறியுள்ளது. குறிப்பாக திருப்பூர் மாவட்டம், பல்லடம் மற்றும் காங்கேயம் பகுதிகளில் பல கோழி பண்ணைகள் செயல்பட்டு வருகின்றன. இங்கு விவசாயிகள் பிராய்லர் கோழிக்குஞ்சுகளை 42 நாட்கள் வளர்த்து, வாடிக்கையாளர்களுக்கு வழங்கும் பணியில் ஈடுபட்டுள்ளனர்.
ஒரு கிலோ பிராய்லர் கோழிக்கு அவர்கள் பெறும் கூலி ரூ.6.50 மட்டுமே. மின்சாரம், வெப்பநிலையை பராமரிக்கும் அடுப்புக்கரி போன்ற மூலப் பொருட்கள் பல மடங்கு விலைவாசி அதிகரித்துள்ள நிலையில் கூட, கூலி இதே அளவில் நிர்ணயம் செய்யப்பட்டதால் விவசாயிகள் கடும் நஷ்டத்தில் உள்ளனர்.
அதிகரித்துள்ள விலைகளால் பிராய்லர் கோழிக்குப் 20 ரூபாய், நாட்டுக்கோழிக்குப் 25 ரூபாய் என கூலியை உயர்த்த வேண்டும் என விவசாயிகள் கோரிக்கை விடுத்துள்ளனர். கோரிக்கை நிறைவேற்றப்படாவிட்டால், அவர்கள் ஜனவரி 1ஆம் தேதி முதல் உற்பத்தியை நிறுத்தும் போராட்டத்தில் ஈடுபடுவார்கள் என்று அறிவித்துள்ளனர். புதிய கோழிக்குஞ்சுகளும் இந்த நிலையில் வழங்கப்பட மாட்டாது.
இதனால் தமிழகத்தில் கறிக்கோழி வர்த்தகத்தில் பெரிய தாக்கம் ஏற்படும் அபாயம் உள்ளது. பொதுமக்களுக்கு அசைவ உணவை தடையின்றி வழங்க அரசு உடனடி நடவடிக்கை எடுக்க வேண்டும். கால்நடை பராமரிப்பு துறை, பண்ணை விவசாயிகள் மற்றும் உற்பத்தியாளர்கள் உடனடியாக பேச்சுவார்த்தை நடத்தி தீர்வு காண வேண்டும் என விவசாயிகள் கோரிக்கை விடுத்துள்ளனர்.
அல்லது, அறிவித்தபடி உற்பத்தி நிறுத்தம் ஜனவரி 1ஆம் தேதி தொடங்கும் என முடிவு செய்யப்பட்டுள்ளது. இதற்காக அரசின் நடவடிக்கை எது என்பதையே மக்கள் எதிர்பார்க்கிறார்கள்.
