திருவண்ணாமலை : திமுக நிகழ்ச்சியால் ஏற்பட்ட போக்குவரத்து நெரிசல் – பொதுமக்கள் அவதி
திருவண்ணாமலை மாவட்டத்தில் உள்ள மாலப்பம்பாடி பகுதியில் நடைபெற்ற திமுக இளைஞர் அணியின் நிர்வாகிகள் கூட்டம் காரணமாக கடும் போக்குவரத்து நெரிசல் உருவானது. இதனால் அந்தப் பாதையில் சென்ற வாகனங்கள் அனைத்தும் நீண்ட நேரம் நகர முடியாமல் தடைபட்டன.
திமுக வடக்கு மண்டல இளைஞர் அணி நிர்வாகிகள் பங்கேற்ற இந்த நிகழ்ச்சியால், அந்த வழித்தடம் முழுவதும் வாகன நெரிசலில் சிக்கியது. இருப்பினும் பாதுகாப்புப் பணியில் இருந்த காவல்துறையினர், திமுக நிர்வாகிகள் மற்றும் அவர்களது வாகனங்கள் தாமதமின்றி செல்லும் வகையில் தனிப்பட்ட வழிவகுப்பை ஏற்படுத்தியதாகக் கூறப்படுகிறது.
இதன் காரணமாக பொதுமக்கள் சென்ற வாகனங்கள் ஒரு மணி நேரத்துக்கும் மேலாக நிறுத்தி வைக்கப்பட்டன. நீண்ட நேர காத்திருப்பால் பயணிகள் கடும் அவதிக்கு உள்ளாகினர்.
இதற்கிடையில், தாமதம் காரணமாக உணவு நேரம் தள்ளிப்போன நிலையில், அரசுப் பேருந்து ஓட்டுநர் ஒருவர் பேருந்துக்குள்ளேயே அமர்ந்து உணவருந்த வேண்டிய சூழ்நிலையில் இருந்த வீடியோ காட்சிகள் சமூக வலைதளங்களில் பரவின. இந்த காட்சிகள் திமுக நிகழ்ச்சி ஏற்பாடுகள் குறித்து பல்வேறு தரப்பினரிடமிருந்து விமர்சனங்களை எழுப்பியுள்ளது.
