மயிலாடுதுறை மாவட்டத்தில் 22,000 ஏக்கர் நெல்வயல்கள் வெள்ளத்தில் மூழ்கி பாதிப்பு!
மயிலாடுதுறை மாவட்டத்தில் இடையறாத கனமழை காரணமாக 22,000 ஏக்கர் நெற்பயிர்கள் நீரில் மூழ்கி சேதமடைந்துள்ளதாக அந்த பகுதியில் உள்ள விவசாயிகள் வருத்தம் தெரிவித்துள்ளனர்.
கடந்த 24 மணி நேரத்தில், மாவட்டத்தில் அதிகமாக மழை பதிவான பகுதி செம்பனார்கோவில் ஆகும். அங்கு மட்டும் 17 சென்டிமீட்டர் மழை பெய்துள்ளது. இதுடன், மாவட்டத்தின் பல இடங்களில் தொடர்ந்து மிதமான மழையும் பதிவாகியுள்ளது.
கனமழை காரணமாக மாவட்டம் முழுவதும் உள்ள நெல்வயல்களில் நீர் தேங்கியிருப்பதால், சம்பா சீசனில் விதைக்கப்பட்ட சுமார் 22 ஆயிரம் ஏக்கர் பயிர்கள் வெள்ளத்தால் மோசமாக சேதமடைந்துள்ளதாக விவசாயிகள் கவலை தெரிவித்துள்ளனர்.
மேலும், ஆறுகள் மற்றும் வடிகால் கால்வாய்களில் அதிக அளவில் நீர் ஓடுவதால், வயல்வெளிகளில் தேங்கிய நீர் வெளியேற தாமதம் ஏற்பட்டுள்ளதாகவும், தொடர்ச்சியாக மூன்று நாட்களுக்கும் மேலாக தண்ணீர் தேங்கினால் நெற்பயிர்கள் அழுகி விடும் அபாயம் இருப்பதாகவும் விவசாயிகள் எச்சரித்துள்ளனர்.
அத்துடன், வயல்வெளிகளில் தேங்கியிருக்கும் நீரை விரைவாக வெளியேற்றி பயிர்களை காப்பாற்ற அரசு உடனடி நடவடிக்கை எடுக்க வேண்டும் என்றும், வெள்ளத்தால் சேதமடைந்த பயிர்களுக்கு தக்க நிவாரணம் மற்றும் இழப்பீடு வழங்க வேண்டும் என்றும் அவர்கள் வலியுறுத்தியுள்ளனர்.
