நடக்காத விவாதத்திலேயே வெற்றி என பிரசாரம்… பாகிஸ்தான் அணியின் அவதூறு விளம்பரம்!
லண்டனில் நடைபெற திட்டமிடப்பட்டிருந்த இந்தியா–பாகிஸ்தான் இருதரப்பு உறவுகளைச் சார்ந்த விவாதம் திடீரென ரத்து செய்யப்பட்டதால் பல்வேறு கேள்விகள் எழுந்துள்ளன. இந்தியா சார்பில் கலந்து கொள்ளவிருந்தவர்கள் இதில் கடும் அதிருப்தி தெரிவித்துள்ளனர். உண்மையில் என்ன நடந்தது? பார்க்கலாம்.
உலக அளவில் பல முக்கிய பிரச்சினைகள் குறித்து விவாதங்களை நடத்தும் மேடையாக ஆக்ஸ்போர்டு யூனியன் சொசைட்டி நீண்ட காலமாக செயல்பட்டு வருகிறது. அரசியல், பொருளாதாரம் உள்ளிட்ட துறைகளின் நிபுணர்கள் இதில் கலந்து கொண்டு தங்களது கருத்துகளை முன்வைத்து வந்துள்ளனர்.
இந்த வரிசையில், இந்தியா–பாகிஸ்தான் உறவைப் பற்றிய சிறப்பு விவாதம் நவம்பர் 27 அன்று லண்டனில் நடைபெறும் என அறிவித்திருந்தனர். ஆனால், இறுதிக்கணத்தில் பாகிஸ்தான் அணியை சேர்ந்த பேச்சாளர்கள் பங்கேற்பை வாபஸ் பெற்றதால் நிகழ்ச்சி ரத்து செய்யப்பட்டுள்ளது.
பாகிஸ்தான் பேச்சாளர்கள் விவாதத்தைச் சந்திக்க தயங்கியதால் நிகழ்ச்சி ரத்து செய்யப்பட்டது என்பது தெளிவாக இருந்தபோதும், அதனை ஏற்க மறுத்த பாகிஸ்தான் அணியினர்—இந்திய தரப்பினர் பங்கேற்காமல் விலகினர், எனவே நாங்கள்தான் ‘வெற்றி’ பெற்றோம்—என்ற வகையில் ஊடகங்களில் பெருமைபேசத் தொடங்கினர்.
ஆனால், பாகிஸ்தான் வாதங்களை இந்திய தரப்பினர் ஆதாரங்களுடன் முறியடித்து வருகின்றனர். விவாதத்தில் கலந்து கொள்ள ஜூலை 7ஆம் தேதி அழைப்பு கிடைத்தது, ஜூலை 30ஆம் தேதி தன் பங்கேற்பு உறுதி செய்யப்பட்டது என மூத்த வழக்கறிஞர் ஜே. சாய் தீபக் விளக்கம் அளித்துள்ளார்.
தனது குழுவில் இருவர் கூட கலந்து கொள்ளவிருந்ததாகவும் அவர் தெரிவித்தார். விவாதம் தொடங்க இன்னும் 3 மணி நேரமே இருந்த நிலையில், பாகிஸ்தான் பேச்சாளர்கள் லண்டனில் தேடி கிடைக்கவில்லை என்று ஆக்ஸ்போர்டு யூனியன் தெரிவித்ததாகவும் அவர் கூறினார். முன்னதாகவே லண்டனில் உள்ளபோதும், நேரடியாக சந்தித்து விவாதிக்க அஞ்சியதால் பாகிஸ்தான் அணி பின்வாங்கியதாக சாய் தீபக் குற்றம்சாட்டினார்.
மேலும், லண்டனில் ஒளிந்து மறைவதை விட்டுவிட்டு நேரில் வந்து விவாதத்தில் தங்களது நிலைப்பாட்டை முன்வைக்க பாகிஸ்தான் அணியினருக்கு அவர் சவால் விடுத்தார். இதோடு, பாகிஸ்தானுக்கு சாதகமாக நடப்பதாக ஆக்ஸ்போர்டு யூனியனைவும் அவர் கடுமையாக விமர்சித்தார்.
இதனைத் தொடர்ந்து, சிவசேனைச் சேர்ந்த பிரியங்கா சதுர்வேதி—பாகிஸ்தானிடமிருந்து உயர்ந்த தரமுள்ள எந்த செயலையும் எதிர்பார்க்க முடியாது—என்று கிண்டலாக பதிவு செய்துள்ளார். சமூக வலைதளங்களில் பலரும் “போர் தொடங்குவதற்கு முன்பே போர்க்களத்திலிருந்து ஓடியவர்கள் போன்ற செயல்” என நையாண்டி செய்கின்றனர்.
மேலும், ஆப்ரேஷன் சிந்தூரிலும் தாங்களே வெற்றி பெற்றோம் என அடித்துக்கூறிய பாகிஸ்தான், இப்போது நடத்தப்படாமலேயே போய்விட்ட விவாதத்திலும் ‘நாங்கள் வெற்றி’ என தம்பட்டம் அடித்துவருவது கவனம் பெறுகிறது.
