பூங்காவில் நடைபெற்ற மின்சார விபத்தில் 2 வயது குழந்தை தீவிர காயம் – செங்கல்பட்டில் அதிர்ச்சி!
செங்கல்பட்டு மாவட்டம் மறைமலை நகரில் உள்ள ஒரு பூங்காவில் விளையாடிக் கொண்டிருந்த இரண்டு வயது சிறுமி, திடீரென மின்சாரம் தாக்கியதில் கடுமையாக காயம் அடைந்து மருத்துவமனையில் சிகிச்சை பெற்று வருகிறார்.
டிட்வா புயலால் தொடர்ந்து மழை பெய்து வரும் நிலையில், மாநிலம் முழுவதும் பள்ளிகளுக்கும், சில மாவட்டங்களில் கல்லூரிகளுக்கும் முன் எச்சரிக்கை காரணமாக விடுமுறை அறிவிக்கப்பட்டுள்ளது. இப்படியான சூழலில், மறைமலைநகர் திருவள்ளுவர் பூங்காவில் விளையாட வந்திருந்த சிறுமி விபத்துக்கு உள்ளானார்.
பூங்காவில் உள்ள மின்கம்பிகளில் ஏற்பட்ட கோளாறு காரணமாக மின்சாரம் வெளியேறி, சிறுமியை பலத்த அதிர்ச்சியுடன் தூக்கி வீசிவிட்டது. அருகில் இருந்த மக்கள் விரைந்து ஓடி, அவரை மீட்டு செங்கல்பட்டு அரசு மருத்துவமனைக்கு கொண்டு சென்று அனுமதித்தனர்.
இதையடுத்து, சம்பவ இடத்திலுள்ள மின்சாரம் முழுவதுமாக துண்டிக்கப்பட்டது. காவல்துறை மற்றும் மின்சார வாரியத்தினர் திடீர் ஆய்வையும் மேற்கொண்டனர்.
மேலும், பூங்காவில் உள்ள மின்கம்பங்கள் மற்றும் தொடர்புடைய உபகரணங்கள் அனைத்தும் சேதமடைந்த நிலையில் உள்ளன; அவற்றை உடனடியாக சரிசெய்ய வேண்டும் என உள்ளூர் மக்கள் கோரிக்கை விடுத்துள்ளனர்.
