கரூர் மாவட்டத்தில் சமீபத்தில் நடந்த நெரிசல் விபத்தில் 41 பேர் உயிரிழந்த சம்பவம் மாநிலம் முழுவதும் அதிர்ச்சியை ஏற்படுத்தியிருந்தது. இந்த சம்பவத்தைச் சுற்றி சமூக வலைதளங்களில் பல்வேறு அரசியல் கருத்துகள், விமர்சனங்கள், குற்றச்சாட்டுகள் பரவி வருகின்றன.
இந்த நிலையில், “சம்பவத்தைக் குறித்து சமூக வலைதளங்களில் தவறான மற்றும் தூண்டிவிடும் தன்மையான கருத்துகளைப் பதிவிட்டதாக” கூறி, தமிழ்நாடு போலீஸார் பல்வேறு அரசியல் கட்சிகளைச் சேர்ந்த நபர்களை தொடர்ச்சியாக கைது செய்து வருகின்றனர்.
அந்த தொடர் நடவடிக்கையின் ஒரு பகுதியாக, பிரபல ஊடகவியலாளர் பெலிக்ஸ் ஜெரால்டும் கைது செய்யப்பட்டுள்ளார். சமூக ஊடகங்களில் தனது கருத்துகளை பகிர்ந்ததற்காகவே அவரை கைது செய்துள்ளதாக தகவல்கள் வெளியாகியுள்ளன. இந்த நடவடிக்கை ஊடகத்துறையிலும் சமூக ஊடக பயனாளர்களிடமும் பரபரப்பை ஏற்படுத்தியுள்ளது.
EPS கண்டனம்
பெலிக்ஸ் ஜெரால்டின் கைது குறித்து அதிமுக பொதுச் செயலாளர் மற்றும் எதிர்க்கட்சித் தலைவர் எடப்பாடி கே. பழனிசாமி தனது எக்ஸ் (X) தளத்தில் பதிவிட்டுப் கடும் கண்டனம் தெரிவித்துள்ளார்.
கைது நடவடிக்கை கருத்துச் சுதந்திரத்துக்கு எதிரானது எனவும், ஆட்சியின் பெயரில் விமர்சன குரல்களை அடக்க முயற்சி மேற்கொள்ளப்படுகிறது எனவும் அவர் தனது பதிவில் குற்றம்சாட்டியுள்ளார்.
பெலிக்ஸ் ஜெரால்டின் கைது தொடர்பான EPS–ன் பதிவு தற்போது சமூக வலைதளங்களில் பரவலாக பேசப்படுகிறது.
