சபரிமலை ஐயப்பன் கோயிலின் மண்டலகால வழிபாடு நேற்று மிகுந்த செழுமையுடன் ஆரம்பமானது. புதிய மேல்சாந்தி பிரசாத் நம்பூதிரி கோயில் நடையைத் திறந்து வைத்து வழிபாடுகளை நடத்தினார். இந்த ஆண்டு மண்டல பூஜை வரும் டிசம்பர் 27–ஆம் தேதி நடைபெற உள்ளது. இதற்கான முன்னோட்டமாக கோயில் நடை இரண்டு நாட்களுக்கு முன் மாலை 5 மணிக்கு திறக்கப்பட்டது.
நேற்று அதிகாலை முதலே மண்டல வழிபாடுகள் தொடங்கின. புதிய மேல்சாந்தியாக பொறுப்பேற்ற பிரசாத் நம்பூதிரி ஐயப்பன் சந்நிதி கதவையும், மனு நம்பூதிரி புரத்தம்மன் கோயில் நடையையும் திறந்து வைத்தனர்.
அதனைத் தொடர்ந்து முன்தின அலங்காரங்கள் அகற்றப்பட்டு நிர்மால்ய பூஜை, அபிஷேகங்கள், கணபதி ஹோமம், நெய்யபிஷேகம் ஆகியவை நடைபெற்றன. அதன் பின் முதல்கால உஷத் பூஜை, சிறப்பு அலங்காரம், தீபாராதனை, உச்சிக்கால பூஜை ஆகியன நடந்தன. பகல் 1 மணிக்கு நடை மூடப்பட்டு, மாலை 3 மணி முதல் இரவு 10.45 மணி வரை வழிபாடுகள் தொடர்ந்தன.
மண்டலகாலத்தின் முதல் நாளாக இருந்ததால் பக்தர்கள் கூட்டம் கட்டுக்கடங்காத அளவுக்கு அதிகரித்தது. பம்பா பாலம், கணபதி கோயில், நீலிமலை ஏற்றம், நடைப்பந்தல் போன்ற பகுதிகளில் கடும் நெரிசல் உருவானது. நிலக்கல்லில் இருந்து பம்பா நோக்கி அரசுப் பேருந்துகள் போதிய அளவில் இயக்கப்படாததால் பயணிகள் பலர் சிரமத்துக்கு உள்ளாகினர்.
சந்நிதான கொடிமரம் அருகில் திருவிதாங்கூர் தேவசம் வாரியத் தலைவர் ஜெயக்குமார் ‘சபரிமலை டைரி’யை வெளியிட்டார். ரூ.80, ரூ.220, ரூ.330 என மூன்று விலை வகைகளில் இந்த டைரிகள் தேவஸ்தான ஸ்டால்களில் கிடைக்கும் என அறிவிக்கப்பட்டது.
வனப் பாதைகள் திறப்பு – பாதயாத்திரை பக்தர்கள் அதிகளவில் பயணம்
பாதயாத்திரை மேற்கொள்ளும் பக்தர்களுக்காக சபரிமலையின் வனப் பாதைகள் நேற்று மீண்டும் திறக்கப்பட்டன. இதனால் சத்திரம் மற்றும் அழுதகடவு போன்ற பாரம்பரிய வழித்தடங்களில் மீண்டும் பக்தர்கள் நடந்து செல்ல தொடங்கினர். கடந்த மகரவிளக்குப் பூஜைக்குப் பிறகு இந்த பாதை பயன்படுத்தப்படாததால் விலங்குகள் நடமாட்டம் அதிகரித்திருந்தது.
இதையடுத்து, வனத் துறை துப்பாக்கியுடன் ஆயுதம் ஏந்திய குழுவினரை பக்தர்கள் குழுக்களுக்கு முன்பாக அனுப்பி பாதுகாப்பு வழங்கியது. துணை இயக்குநர் சஞ்சீப், வனச்சரக அலுவலர் பென்னி, பிரிவு அலுவலர் பிரசாந்த் ஆகியோர் நேரடியாக மேற்பார்வையிட்டனர். அழுதகடவு பாதையில் நேற்று குறிப்பிடத்தக்க அளவில் பக்தர்கள் சென்றனர்.
வனத்துறை அதிகாரிகள் தெரிவித்ததாவது:
– குளுக்கோஸ், பிஸ்கெட் உள்ளிட்ட பிளாஸ்டிக் பொருட்களை கொண்டு வரக்கூடாது.
– மசாலா பொருட்களின் மணம் விலங்குகளை ஈர்க்கும்; எனவே அவற்றைத் தவிர்க்க வேண்டும்.
– சத்திரம் நுழைவாயிலில் காலை 7 மணி முதல் மதியம் 1 மணி வரை மட்டுமே அனுமதி வழங்கப்படும்.
– 4 மணி நேரத்திற்குள் பாதையை முடித்து வெளியேற வேண்டும்.
– முதியவர்கள் மற்றும் உடல்நலக்குறைவால் பாதிக்கப்பட்டவர்களுக்கு தனிப்பட்ட பாதுகாப்பு ஏற்பாடுகள் செய்யப்பட்டுள்ளன.
