தமிழகத்திலுள்ள பாரம்பரியமும் தொல்லியல் முக்கியத்துவமும் வாய்ந்த கோயில்களை பாதுகாப்பதற்காக மாநில அளவில் புராதன சின்னங்கள் ஆணையம் உருவாக்க வேண்டும் என்ற வழக்கில், அந்த ஆணையத்தை அமைக்க தமிழக அரசுக்கு மேலும் ஒரு மாத கால அவகாசம் வழங்கி சென்னை உயர்நீதிமன்றம் உத்தரவிட்டுள்ளது.
திருவண்ணாமலை அருணாசலேஸ்வரர் கோயில் ராஜகோபுரம் முன்பாக வணிக வளாகம் கட்டப்படுவதற்கு எதிர்ப்பு தெரிவித்து, மயிலாப்பூர் ஆலய வழிபாட்டு குழுத் தலைவர் டி.ஆர். ரமேஷ் உள்ளிட்டோர் தாக்கல் செய்த வழக்குகளை முன்பு விசாரித்த நீதிமன்றம், கடந்த அக்டோபர் 9-ஆம் தேதி, புராதன, வரலாற்றுச் சிறப்பு மிக்க கோயில்களின் அமைப்பு, கட்டமைப்பு ஆகியவற்றை காப்பதற்காக மாநில புராதன சின்னங்கள் ஆணையத்தை நான்கு வாரங்களுக்குள் அமைக்க தமிழக அரசு நடவடிக்கை எடுக்க வேண்டும் என உத்தரவிட்டிருந்தது.
இதற்கிடையில், இந்த வழக்கு நேற்று நீதிபதிகள் ஆர். சுரேஷ்குமார் மற்றும் எஸ். சவுந்தர் அமர்வில் மீண்டும் விசாரணைக்கு வந்தது. அந்த நேரத்தில் அறநிலையத்துறை சார்பாக ஆஜரான சிறப்பு அரசு வக்கீல் என்.ஆர்.ஆர். அருண் நடராஜன், மாநில புராதன சின்னங்கள் ஆணையம் அமைக்க அரசில் நடவடிக்கைகள் தொடங்கப்பட்டுள்ளன; முழு செயல்முறையும் மூன்று மாதங்களில் முடிந்து ஆணையம் அமைக்கப்படும் என தெரிவித்தார்.
மேலும், வரும் டிசம்பர் 3-ஆம் தேதி நடைபெறவுள்ள திருவண்ணாமலை கார்த்திகை தீபத் திருவிழாவுக்கு 20 லட்சத்துக்கும் அதிகமான பக்தர்கள் வரலாம் என்பதால், அவர்களுக்கான தரிசன ஏற்பாடுகளை தற்காலிகமாக செய்ய அனுமதி வழங்க வேண்டும் என்றும் கோரினார்.
நீதிபதிகள், தமிழகத்தின் அனைத்து புராதன கோயில்களும் பாரம்பரியத்தைக் குலைக்காமல் புதுப்பிப்பு செய்யப்பட வேண்டும் எனவும், அதற்காக மாநில அளவிலான புராதன சின்னங்கள் ஆணையம் அமைப்பது மிக அவசியம் எனவும் தெரிவித்தனர். மேலும், ஆணையம் அமைக்கப்படும் வரை திருவண்ணாமலையில் எந்தக் கட்டுமானப் பணிகளும் மேற்கொள்ளக் கூடாது என்ற தடை உத்தரவை நீட்டித்தனர்.
அதோடு, புராதன சின்னங்கள் ஆணையம் அமைக்க தமிழக அரசுக்கு ஒரு மாத கால அவகாசம் வழங்கி, கார்த்திகை தீபத்திருவிழாவை முன்னிட்டு தற்காலிக மாற்று ஏற்பாடுகளை செய்ய அறநிலையத்துறைக்கு அனுமதி அளித்து, வழக்கை டிசம்பர் 18-ஆம் தேதிக்கு தள்ளினர்.
இதற்கிடையில், சிதம்பரம் நடராஜர் கோயில் கனகசபையில் இருந்து பக்தர்கள் தரிசன அனுமதி வழங்கப்பட்டதை எதிர்த்து தொடரப்பட்ட வழக்குகளையும் நீதிமன்றம் விசாரித்தது. இந்த விவகாரத்திற்கு தீர்வு காண வேண்டியது பொது தீட்சிதர்களின் பொறுப்பே என நீதிபதிகள் குறிப்பிட்டு, விசாரணையை டிசம்பர் 11-ஆம் தேதிக்கு ஒத்திவைத்தனர்.
