கோவை அவிநாசி சாலையில் போக்குவரத்து நெரிசலை குறைக்கும் நோக்கில், மாநில நெடுஞ்சாலைத்துறை சார்பில் உப்பிலிபாளையம் முதல் கோல்டுவின்ஸ் வரை 10.10 கிலோமீட்டர் தூரத்தில் கட்டப்பட்ட ஜி.டி. நாயுடு மேம்பாலம் கடந்த 9ஆம் தேதி பொதுமக்கள் பயன்பாட்டுக்கு திறக்கப்பட்டது.
போலீசார், இந்த மேம்பாலத்தில் வாகனங்கள் அதிகபட்சம் 60 கி.மீ. வேகத்தில் மட்டுமே செல்ல வேண்டும் என்றும், இறங்கும் பகுதிகளில் 30 கி.மீ. வேகத்தைக் கடக்கக் கூடாது என்றும் அறிவுறுத்தியுள்ளனர். இதற்கான எச்சரிக்கை பலகைகளும் பல இடங்களில் வைக்கப்பட்டுள்ளன.
இருப்பினும், சிலர் இதை மீறி அதிவேகமாக பயணித்து வருகின்றனர். கடந்த வாரம், ஒரு கார் கட்டுப்பாட்டை இழந்து லாரியுடன் மோதியதில் மூவர் உயிரிழந்த விபத்து இதற்கு சான்றாகும். இதனைத் தொடர்ந்து, போலீஸார் மேம்பாலத்தின் 40 இடங்களில் அதிநவீன கண்காணிப்பு கேமராக்கள் பொருத்த தீர்மானம் எடுத்துள்ளனர்.
சமூக ஆர்வலர் மற்றும் கோவை சிட்டிசன்ஸ் வாய்ஸ் கிளப் தலைவர் சி.எம். ஜெயராமன் இதுகுறித்து தெரிவித்ததாவது:
“மேம்பாலத்தின் இருபுற முடிவுகளிலும் போலீஸ் பேட்ரோல் வாகனங்கள் நிலையாக கண்காணிக்க வேண்டும். ஏறுதல் மற்றும் இறங்குதல் பகுதிகளில் எச்சரிக்கை பலகைகளை 100 மீட்டர் முன்னதாக வைக்க வேண்டும். சட்டப்படி அனுமதிக்கப்படும் வகையில் வேகத் தடைகள் அமைக்கலாம். மேலும், விபத்துகள் ஏற்பட்டால் உடனடியாக மீட்பு பணிகள் நடைபெற, மேம்பாலத்தின் இருபுறங்களிலும் ஆம்புலன்ஸ் வாகனங்கள் எப்போதும் தயார் நிலையில் இருக்க வேண்டும்,” என்றார்.
இதுகுறித்து கோவை மாவட்ட ஆட்சியர் பவன்குமார் கிரியப்பனவர் கூறியதாவது:
“ஜி.டி. நாயுடு மேம்பாலத்தின் இறங்குதளங்களில் ரப்பர் வேகத் தடைகள் அமைக்கப்பட்டுள்ளன. உப்பிலிபாளையம் ரவுண்டானா அருகே போக்குவரத்து ஒழுங்கைச் சீரமைக்க சிக்னல்கள் நிறுவப்பட்டுள்ளன. மேலும், மேம்பாலத்தின் பல இடங்களில் ‘ஏஐ’ (AI) தொழில்நுட்பத்துடன் கூடிய சிசிடிவி கேமராக்கள் பொருத்தப்படுகின்றன. இதன் மூலம் அதிவேகமாக அல்லது விதிமீறி செல்லும் வாகனங்கள் தானாக கண்டறியப்படும்; அவர்கள் மீது சட்டப்படி நடவடிக்கை எடுக்கப்படும். அதேபோல், வாகனங்கள் ஏறும் மற்றும் இறங்கும் இடங்களில் அறிவிப்புப் பலகைகளை முன்னதாகவே வைக்க நடவடிக்கை எடுக்கப்பட்டுள்ளது,” என்றார்.
