‘ஆர்யன்’ படத்தின் கிளைமாக்ஸ் ஏன் மாற்றப்பட்டது? – நடிகர் விஷ்ணு விஷால் விளக்கம்
விஷ்ணு விஷால், செல்வராகவன், ஷ்ரத்தா ஸ்ரீநாத், மானசா உள்ளிட்டோர் நடித்த ‘ஆர்யன்’ திரைப்படம், விஷ்ணு விஷால் ஸ்டூடியோஸ் தயாரிப்பில் பிரவீன் கே இயக்கத்தில் கடந்த அக்டோபர் 31 அன்று வெளியாகி நல்ல வரவேற்பைப் பெற்றுள்ளது. இதையொட்டி சென்னையில் நன்றி தெரிவிக்கும் விழா நடைபெற்றது.
அந்த நிகழ்ச்சியில் பேசிய நடிகர் மற்றும் தயாரிப்பாளர் விஷ்ணு விஷால் கூறியதாவது:
“ஆர்யன்’ படத்தை முதலில் 2023-ல் வெளியிட திட்டமிட்டிருந்தோம். சில தாமதங்கள் காரணமாக, அதனை இன்னும் சிறப்பாக உருவாக்க முடிந்தது. இயக்குநர் பிரவீன், புதுமையும் துணிச்சலும் கலந்த ஒரு முயற்சி செய்துள்ளார்.
சிலர் ‘கதையில் நான் தலையிட்டேனா?’ என்று கேட்கிறார்கள். என் பார்வையில், இது ஒரு கூட்டு முயற்சி. ஹீரோவாக இருப்பது ஒரு பொறுப்பு. பார்வையாளர்கள் தியேட்டருக்கு இயக்குநருக்காக மட்டும் அல்ல, நடிகருக்காகவும் வருகிறார்கள். எனவே, அந்த அளவில் நான் கதையிலும் ஈடுபாடு கொண்டிருந்தேன்.”
கிளைமாக்ஸ் மாற்றம் குறித்து அவர் விளக்கமளித்தபோது,
“படத்தின் முடிவு குறித்து எங்களுக்குள் பல விவாதங்கள் நடந்தன. இரண்டு வகை முடிவுகள் இருந்தன — ஒன்று நியாயப்படுத்தும் விதமாகவும், மற்றொன்று வேறுபட்டதாகவும். பார்வையாளர்களுக்கு பிடிக்கும் என நினைத்ததை வைத்தோம். ஆனால் அது சில நெகட்டிவ் எதிர்வினைகள் பெற்றதால், அதை நீக்கி புதிய கிளைமாக்ஸ் சேர்த்தோம். தற்போது அந்த புதிய பதிப்புடன் படம் வெற்றிகரமாக ஓடிக்கொண்டிருக்கிறது,” என்றார்.
அவர் மேலும் கூறினார்:
“என் சமீபத்திய படங்கள் திரையரங்கிலும் OTT-யிலும் நல்ல வரவேற்பைப் பெற்றுள்ளன. ‘ஆர்யன்’ அதேபோல் வெற்றியைத் தொடர்ந்து வருகிறது.
அடுத்து ‘கட்டா குஸ்தி 2’, என் சகோதரருடன் ஒரு படம், மேலும் அருண்ராஜா காமராஜ் இயக்கும் படம் என பல திட்டங்கள் உருவாகிக் கொண்டிருக்கின்றன. ரசிகர்கள் விரும்பும் வகையிலான படங்களைத் தொடர்ந்து வழங்குவேன்,” என தெரிவித்தார்.
